› 選擇地區
三藩市
紐約
洛杉磯
其他美國地區
香港 台灣 北美
 
2015年06月23日

隔牆有耳:攞百幾萬個市民簽名話咁易
新東補選 周融冇得輸 - 李八方

有份創立公民黨嘅湯家驊宣佈退黨之餘,仲決定辭任埋新界東立法會議員,唔少花生友話,估唔到湯狀搶閘民主黨何俊仁搞辭職。而湯狀辭任,即係立法會要搞補選啦,八方相信,上屆飲恨出局嘅哪吒方國珊,好有機會捲土重來,工聯會可能都會派人爭一爭。但其實除咗佢哋,仲有乜人選可以揀?
八方喺新東選區入面嘅堆填區收集過意見,覺得保普選反佔中大聯盟召集人周融都係不二之選,事關佢次次出動反佔中都好有「幹勁」,又可以攞到百幾萬個聲稱撐政改嘅市民簽名喎,扣除當中有可能嘅水份,都應該夠票當選啦,仲唔係建制派大熱之選?四個字,「冇得輸」。

偲嫣屈穎妍有潛力

如果要女將,正義聯盟召集人李偲嫣都唔錯,戰鬥力明顯好頑強,至少以絕食減磅嗰份毅力,以及以妹豬學生look跳飛機嘅勇氣,就肯肯定能人所不能。嗱,要選立法會就要預咗受抹黑、要被挑機,相信偲嫣BB若然肯上陣,一定頂得住壓力,越戰越勇兼越slim。
最後呢,屈穎妍都不妨考慮吓出戰吖,八方記得,屈穎妍寫過文撐湯狀㗎,嗰次全體立法會議員到上海訪問,湯家驊冇跟黨去茶餐廳外派普選傳單、反而跟咗大隊去參觀考察,當時屈穎妍曾撰文力撐:「湯家驊默默跟着大隊,受千夫所指,仍忍辱負重,才是真心為民的議員」,唔知湯狀嘅支持者,會唔會想屈穎妍代為出征報仇?

識睇睇留言

Power Fox:真心想薑蓉參選……我好想見多一次百幾萬人簽名支持佢!
Lh Li:我撐李思(偲)嫣小姐,李小姐,上!砌低周生,林太屈女士!上!
Lam AL:天生一對,搞埋一推(堆)!
CrabSaf:我支持肥豬嫣去選,因為大家可以多D(啲)笑料!!哈哈!!
資料來源:《蘋果》網頁

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載