› 選擇地區
三藩市
紐約
洛杉磯
其他美國地區
香港 台灣 北美
 
2015年06月22日

政壹花生友:
政改蝦碌賬 西環搵人找數 - 花生友

林健鋒

唔知呢排多唔少市民翻睇《大內密探零零發》?又或者日loop夜loop「遲來一秒鐘、遲疑一秒鐘,從迎接你變做目送」?但肯定嘅係花生銷量急升,日日睇住建制派逐一推莊卸責,都值回票價,而花生友更發現,原來市民喺呢場「政改甩轆賽」中,最鍾意睇嘅其實係陰謀論。
以下呢個消息,唔知大家會唔會演繹成:阿爺根本有大換血嘅陰謀?話說喺政改蝦碌收場後,一盤散沙嘅建制派陣營,隨即有消息傳出:嚟緊建制派選舉部署,一定會因為呢次事件有變化。

林健鋒葉國謙要拜拜?

嗱,好似被認定係呢件事嘅始作俑者經民聯林健鋒咁,據聞佢原本想喺代表總商會嘅商界功能組別繼續再坐一會,但今次成為政改大罪人,肯定令唔少支持通過政改嘅總商會人士不滿,而為咗穩住總商會穩定,有傳西環或者支持換馬。
至於身為建制派立法會「班長」但又無做好協調嘅民建聯葉國謙,雖則有指佢今次區選唔連任,意味下屆立法會唔選傳統區議會界別,但世事難料,邊個可以咬定,政府唔會修例話同區議會有密切聯繫就可以參選,唔一定要係區議員?換言之葉國謙仲有機會冧莊。但經此一役衰咗,加上之前協調建制派入工務同人事編制小組亦蝦碌,有人覺得佢唔使再諗連任,因為西環肯定唔畀佢選。咁又係,呢筆「政改蝦碌賬」,西環都肯定要搵一兩個建制派出嚟「找數」自保嘅。

花生友

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載