› 選擇地區
三藩市
紐約
洛杉磯
其他美國地區
香港 台灣 北美
 
2015年06月22日

隔牆有耳:
在座冇投票 隱形人一炮而紅
勞聯潘兆平政改「贏家」 - 李八方

政改一如所料否決,點知又出現「等埋發叔」大甩轆,玩離場嘅建制派、港府、北京全部係大輸家,「盡忠職守」嘅8名建制議員成為贏家之餘,泛民亦無端端因為對家自己射入自己龍門,掹車邊叫贏咗少少,不過,八方同政界、官場中人傾開,其實呢次「等埋發叔」事件入面,仲有不為人留意嘅另類贏家同輸家。

左派預製文章變垃圾

八方先講另類輸家。有政界中人話,原本北京諗住投完票之後,就向泛民發動票債票償打擊行動。該政界中人聽聞,左報同某啲親政府報紙,一早做好晒預製文章,炮轟泛民拎住27票否決大多數議員支持嘅政改方案,據聞有人連號外內容都準備埋,點知建制大甩轆得嗰8票支持,之前啲預製件全部唔用得之餘,仲要大轉軚同建制救火,更加唔好講票債票償,唔通走去打建制咩,所以左報係有苦自己知。
又有官場中人向八方自嘲,佢哋都係「另類輸家」,不過唔係講政改三人組,而係其他唔關事嘅政策局,因為建制派畀人係咁打,佢哋隨時要喺特首命令下,出手為建制派救亡,咁即係又要政府「開水喉」、畀政策益建制派,「到時咪又做死我哋班公務員!」
講完「另類輸家」,咁邊個係「另類贏家」?該官場中人話,今次「大贏家」一定唔係田少,而係當日喺議事廳內冇投票嘅勞聯潘兆平!佢話喺政改投票翌日,喺政府總部同幾個相熟保安叔叔吹水,「佢哋話唔係呢單嘢,都唔知原來有個立法會議員叫潘兆平,仲要係勞工界!」呢位素來存在感近乎零嘅議員,𠵱家一炮而紅,唔使再做完5年任期都冇人知佢係議員,你話係咪「另類贏家」先?

李八方

mailto:pf_lee@appledaily.com

蘋果20年 企硬我敢言
http://20.appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載