› 選擇地區
三藩市
紐約
洛杉磯
其他美國地區
香港 台灣 北美
 
2015年06月17日

隔牆有耳:
國師:唔cut習近平奧巴馬線 - 李八方

警方日前喺西貢蠔涌亞視舊片廠破獲一個炸藥庫,被捕人士部份自稱係本地激進組織「全國獨立黨」成員,呢個組織聲稱要將台獨、港獨派別組織連結埋一齊,形成一幫新嘅獨立勢力。嗱,講起獨立,大家一定想知道,俾唔少建制派封為港獨之父、主張城邦論嘅本土派學者陳雲點睇?之但係八方同事前日打畀國師表明身份後,隨即俾人cut線,據聞其他報章記者打去查詢亦獲同等待遇。
查實國師唔係第一次cut記者線,但原來cut唔cut線唔係一如網民成日提出嘅夠鐘食藥未,而係視乎來電者係乜水,如果係國家最高領導人,就有機會獲國師接聽電話,聽吓佢把獨特聲線㗎。

出文武文件夾課金

八方點解咁講,睇吓國師噚日喺facebook嘅留言就知,佢話:「好簡單的,習近平總書記和奧巴馬總統的電話,我是不會cut線的。一齊online,展開中、美、港三方會談嘛。」明晒啦,原來國師係按階級接電話,八方只能自嘆:而我不是奧巴馬或習近平,唔知兩位大國領導人,幾時打電話同國師交流吓建國立邦嘅意見呢?國師其後意猶未盡,曾經叫記者「落地獄」嘅佢補充話:「識cut一定cut《蘋果》先。」
既然國師咁紅,由佢創立嘅香港復興會就整咗一批「一日最衰都係陳雲」文件夾出售「課金」,佢哋喺facebook展示咗兩款設計,一文一武,前者係國師拎住本《香港城邦論》嚟睇,後者就係佔領時佢以拖篋作盾牌嘅靚相,似乎用自嘲做賣點。

李八方

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載