› 選擇地區
三藩市
紐約
洛杉磯
其他美國地區
香港 台灣 北美
 
2015年06月13日

隔牆有耳:
曾離家出走 懲教學員攞金笛
- 李八方

懲教主任林世泳(左起)、二級懲教助理曾若樺同吳兆恒噚日畢業,分享訓練經歷。

噚日晏晝係懲教署職員訓練院新一屆嘅學員結業會操,由公務員敍用委員會主席、商務及經濟發展局前局長劉吳惠蘭主禮,咁啱噚日有班公務員係報紙登全版公開信話要反「假普選」,成班記者係典禮完咗之後,梗係追住佢問反應,不過劉吳惠蘭淨係笑笑口咁拋低咗句「哈囉!你哋好」就急急腳上咗車。
冇咗劉吳惠蘭,懲教署就安排左三個畢業學員見記者,當冇個橙都有個桔!其中一位攞「金笛」獎嘅學員吳兆恒嘅身世好特別。今年吳兆恒只得22歲,佢自幼就因為父母雙亡,係保良局住咗半年,之後就俾一個警察家庭收養咗。
吳兆恒話佢由細到大未曳過,最多都係喺青少年反叛期時候,因為瞞住屋企人同同學仔一齊去牙科保健睇牙醫,唔同寄養姨姨去,驚寄養姨姨鬧佢,所以就離家出走去咗同學仔嘅屋企過咗一晚夜喎,佢話因為自己嘅成長經歷好特別,想將呢啲經歷話畀年輕嘅在囚人士知,就算家庭背景特殊,只要懷住正確嘅思想就唔會走上歪路,就好似佢咁!

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載