› 選擇地區
三藩市
紐約
洛杉磯
其他美國地區
香港 台灣 北美
 
2015年06月03日

隔牆有耳:《民主會戰勝歸來》改編成屠城史
夫子唱出六四 - 李八方

聽日就係六四26周年紀念,當年有份喺北京採訪嘅《文匯報》前記者劉銳紹近月獲邀,為《民主會戰勝歸來》嘅國語版《歷史一段》主唱,首歌由原班人馬改編,講述六四屠城歷史。人稱夫子嘅劉銳紹話,作曲同埋填詞人想由「六四人」唱呢首「六四歌」,所以夫子厚住面皮一口答應,但未知會否喺聽嘅集會播放。
《民主會戰勝歸來》係2012年的香港社運歌曲,由樂隊VIIV演唱。創作人今年將呢首歌改編為國語,畀喺內地來港參與紀念六四嘅同胞都有歌可唱,抒發悲傷情感。夫子本身係時事評論員,專門評論內地時政,分析國家領導人講話,但今次願意轉行做「歌手」,因為創作人希望由一位與六四有關連嘅人唱呢首歌。

雨傘運動有份

夫子同八方講,喺錄歌前攞番當年採訪六四嘅傳單、遺書影印本、照片出嚟,諗番當年嘅畫面、充滿感情去唱呢首歌。歌詞除咗講六四屠城,坦克點樣「輾破血肉」,仲將香港嘅雨傘運動掛鈎,歌詞最後有幾句係咁寫:「一代又一代的燦爛 張開了理想的傘 選擇愛 還是要遺忘」,夫子話,曾經同新一代討論六四問題,認為要佢哋討論對六四嘅看法,首先唔好一開始否定年輕人嘅想法,否則咁同共產黨無異,要畀年輕人清楚知道香港與內地係互相影響。
夫子話,當年佢喺北京採訪六四,真係槍林彈雨,睇住掌權者以武力對付學生,希望港人唔好遺忘六四,思考點樣繼續爭取民主普選,聽晚維園見。

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載