› 選擇地區
三藩市
紐約
洛杉磯
其他美國地區
香港 台灣 北美
 
2015年05月20日

隔牆有耳:話恥與為伍 籲讀者罷買
屈穎妍同《明報》割席 - 李八方

警察拉錯智障男單醜聞又觸發藍黃絲大戰。作家屈穎妍出晒名係藍絲健筆,上周喺報章專欄力撐警察制度「滴水不漏」,俾黃絲瘋狂聲討,有傳媒報道屈女士因為網上「滅門」恐嚇而報警求助。學丁蟹話齋「人善人欺天不欺」,屈女士無畏無懼,頻頻寫文還拖,但《明報》引述智障者家屬怒斥屈女士喺傷口灑鹽等報道就搞到佢嬲豬割席,噚日宣佈停寫《明報》專欄。

指劉進圖招攬搶《蘋果》客

其實警察拉錯人之後,藍絲都自覺理虧,點知屈穎妍力排眾議,喺《頭條日報》盛讚警察,「我們應該慶幸,在小島蒙冤的人,頂多受苦七十二小時」,又批評政客傳媒炒作,「遲早逼得警察不做不錯,由得兇手逍遙、殺手滿街」。篇文被瘋狂轉載,藍絲士氣大振,黃絲口誅筆伐,《明報》之後出咗幾篇訪問,引述智障者家屬對屈女士言論嘅批評。屈女士眼火爆,再寫文鬧《明報》「一次又一次點名撩事」,又質疑「言論自由只是黃色的專利」,怨記協從未為佢發聲。篇文越扯越遠,聲稱《明報》前總編劉進圖曾經想招攬佢加盟,「要做一份搶《蘋果》客的年輕報紙」,今時今日佢「恥與明報為伍」,呼籲讀者罷買,篇文以高局長霸氣名句「講完」作結。
但劉進圖就同《立場新聞》澄清,當年係想報紙年輕化,但搶《蘋果》客之說只係屈女士自己想像,而且只係想請佢做副刊,唔係做新聞。八方噚日打過畀屈女士,佢一聽到係《蘋果》記者就好客氣咁話:「唔使喇,唔訪問,唔該,拜拜。」
《壹錘定音》噚日話《明報》有意搵曾為CY助選、外號「爆咪姐」嘅潘麗瓊取代屈女士喺副刊寫專欄,但未最後作實;網民則覺得屈女士唔使擔心吖,《文匯》《大公》歡迎佢。

識睇睇留言

批評:
Ivan Leung:文匯同大公歡迎妳……
Paul Lincoln: 活該,早點走唔好污染明報!
Jacqueline Lam:國之將亡,必有妖孽,屈小姐,你就係其中一隻,無恥則無敵相信係你嘅座右銘!

【支持:】
羅友恆:黃屍報紙,留下只會影衰自己
Yuki Iu: 屈小姐,你去哪個報館,我就看哪個報。
Paddy Wool:日月神報,好早已經做咗毒果b隊,不睇也罷,繼續支持屈小姐文章!

資料來源:《蘋果》網頁及港人講地fb

李八方

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載