› 選擇地區
三藩市
紐約
洛杉磯
其他美國地區
香港 台灣 北美
 
2015年05月19日

隔牆有耳:指表揚楊光一錯再錯
《18樓C座》鬧爆林鄭 - 李八方

工聯會前會長楊光逝世,特區政府又再對佢作出高度評價。毋忘歷史,唔少香港人對呢位當年六七暴動嘅旗手好有意見,覺得署理特首林鄭月娥再次表揚佢,等於喺暴動死者家屬傷口上灑鹽。商業電台嘅廣播劇《18樓C座》當年就係為咗紀念六七暴動中批評左派而被燒死嘅林彬,噚日金剛叔飾演嘅周老闆就用咗一集時間,同大家理性探討楊光功過,仲發現楊光嘅死訊,同67呢個數字有唔少巧合。

逝世與做鬥委主任同日

楊光喺上星期六去世,原來當日咁啱就係本季賽馬第67場賽事,都真係好邪門呀。咁啱呢,工聯會係喺1948年成立,咁啱今年又係第67年喎。而楊光5月16日離世,5月16日係乜嘢日子?再睇遠啲,原來1967年5月16日,香港左派因為新蒲崗塑膠花廠工潮事件,宣佈成立港九各界同胞反對港英迫害鬥爭委員會,時任工聯會理事長嘅楊光,就做咗鬥委會主任。
周老闆話,呢場係暴動唔係革命,一場暴動死咗51個人,包括商台節目主持人林彬先生,同佢堂細佬林光海先生,800幾人受傷,警察處理咗千幾個真假「菠蘿」,拉咗千幾二千人,包括𠵱家嘅民政事務局局長曾德成,劇中角色仲話,咁同舊年嘅佔領運動比,一個人都冇死到,啲廢青又冇放炸彈,反而警察就放咗87個催淚彈,都真係小巫見大巫。
周老闆就話,老董喺01年頒咗個大紫荊勳章畀楊光,今次又由署理特首林鄭出聲明話佢「多年來積極參與香港工運,對勞工福利有突出建樹;長期為廣大基層服務,貢獻良多」,但唔提六七暴動。佢覺得咁做係一錯再錯,冇諗過死者家屬感受,喺人哋傷口灑鹽。既然楊光對勞工福利有突出建樹,咁喺爭取全民退保、標準工時等議題上,工聯會又做過啲乜?

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載