› 選擇地區
三藩市
紐約
洛杉磯
其他美國地區
香港 台灣 北美
 
2015年05月17日

改《警察故事》主題曲諷拉錯人

梁栢堅出版鹹濕歌詞集《甜詞》(小圖),為童年夢想找數。黃耀興攝

【本報訊】形容梁栢堅為「黃色詞人」,亦因為他是少數願意公開自己是「黃絲帶」的全職填詞人,在雨傘運動期間眼見暗角打鑊、警棍亂舞種種不平事,他寄情改詞「唱衰你」,警方說警察是慈母,他便將《真的愛你》改成《真的毆你》,《七友》改成《七警》,如此高調不怕被封殺嗎?「冇理喎,可能有人會話,你係黃絲我唔搵你寫,但唔做就唔做啦!」

相關新聞:蘋果生活:圓童年夢想 探討本地文化黃色詞人出書填鹹濕歌

2012年起寫政治話題

早於雨傘運動開始前,他已支持學生罷課,9.28當天他更「飯都食唔落」,種種荒謬事件都成為他的創作靈感,最嬲可數七警涉暗角打人一事,他將《七友》改成《七警》,「你話警察係慈母?我就搵首讚母親嘅歌嚟改」。梁栢堅坦言當時感覺很無力,監警會好似甚麼也做不到,「惟有唱衰你」。
近日智障人士被錯誤檢控亦令他很憤怒,結果他又改寫了成龍的《警察故事》主題曲《硬漢子》作諷刺,「我都唔想鬧,但警方死都唔認錯,仲衰過丁蟹,其實深夜道歉都係太早,應凌晨4點先道歉吖嘛!」
他於2012年時已開始將政治話題入詞,至今約有30多首著作,最為人廣傳的可數將《財神到》改為《時辰到》寸梁振英,「其實係政府畀咗題材我哋,如果早20、30年前改政治詞未必有咁大反應,係有咁嘅社會先催生到咁嘅狀況,好似文字打小人咁,如果首歌大賣,大家知咩事啦」。他計劃稍後將政府歌詞結集成書,坦言「趁仲有機會出就出」。
■記者鍾雅宜

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載