蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年05月12日

隔牆有耳:《100毛》開網台 𡁻海珠、黃碗曼坐鎮
毛記電視寸爆TVB - 李八方

如果嫌「無綫新聞、事事旦旦」冇料到,八方推介大家喺5月18號起逢周一至五嘅晚上六點半,轉睇由《100毛》主理、即將開台嘅網台「毛記電視」嘅「六點半左右新聞報道」,事關「毛記電視」話明會以「3粒鐘製作,3分鐘放送」,內容咁濃縮,一定唔會求其啩,齋睇佢哋口號係「毛記新聞,事事花生」,就知會令大家好滿足。
嗱,要贏人先要贏自己,八方都睇過「六點半左右新聞報道」嘅預告短片,發現佢哋嘅台柱主播,唔輸蝕畀無綫㗎,順手拈來有𡁻海珠、東方昇、黃碗曼、周嘉鹽、男秉權、利君牙、55555家謙以及吳檸儁,真係粒粒皆星。再睇佢哋識得問垃圾桶攞回應,就知佢哋全台嘅新聞「觸角」幾咁犀利。

葉家寶都撐

唔少記者都會攀山涉水搵獨家猛料,「毛記電視」亦都話會以拼搏精神,挽回劣質製作,更會深入險境,直擊「毛」聊真相,係咪聽到心癢癢,好想即刻轉台搵啲生趣?唔知tvbuddy會否考慮過檔呢?
但八方都要提醒大家,由於呢個由《100毛》搞嘅「毛記電視」,早前雖然想申請免費電視牌照,但因為懶填表格而撤回申請,最終只係轉戰網上。佢哋早前仲派員去咗問亞視執行董事葉家寶點睇,結果獲葉家寶真實回應,好多人都利用網絡充份發揮創意,簡直係打咗支強心針。

唔少觀眾都話等住剝花生睇呢個以「全力以赴 毛牌仲好」為目標嘅電視台,希望製作多啲好節目畀觀眾……如果18號,真係開台嘅話。

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載