› 選擇地區
三藩市
紐約
洛杉磯
其他美國地區
香港 台灣 北美
 
2015年05月07日

隔牆有耳:
小學做風紀隊長 元秋靠獅吼 - 李八方

當新一哥盧偉聰係班長,議員豈能被比下去?八方八卦吓班議員讀書時有乜「一官半職」陳年威水史,估唔到民建聯蔣麗芸讀小學時係風紀總隊長,元秋話小一至小四係讀名校德望學校,小五至小六就轉校去咗秀茂坪嘅潔心小學,但係插班生竟然受到老師賞識,擔任風紀總隊長,統領曳曳豬學生,唔知見到短裙「妹豬」李偲嫣,會唔會叫佢檢點啲?
元秋天生一把雄渾嗓子,令佢喺擔任風紀總隊長時大顯神威。佢憶述有次放學,同學仔相繼爭落樓梯離校,但底層嘅樓梯鐵閘未開,上層嘅同學卻不斷湧緊落嚟,人逼人嘅環境好侷促,有同學等到面色發紫,佢好擔心搞出人命,即時向上面大聲喝令,喝停同學唔好再逼落嚟。同學仔聽到佢嘅獅吼,即時煞停腳步,元秋就抱起面色發紫嘅同學去休息室唞吓:「嗰時都唔知點解自己可以咁大力。」元秋話喎,風紀總隊長一職令佢變得有紀律,懂得以大局為重,難怪阿爺吹雞時咁乖啦。

湯家驊走堂打牌

讀跑馬地瑪利諾(現為瑪利曼)中學嘅民主黨劉慧卿,話自己當年係學校嘅student councillor(學生代表),負責學生領袖嘅角色,但佢話呢間係修女學校,即使同學想點都係冇用,好多時都係修女話點就點。
突然變咗特首黑馬嘅公民黨湯家驊就話,讀皇仁時出名係頑童,天生唔鍾意上堂,走堂或早走去同同學打牌、踢波先係佢享受嘅校園生活。湯狀話𠵱家佢律師樓請人時,應徵者喺中學有冇做過班長,完全唔會理會,對方來自邊間大學、大學時去過邊度見識先係考慮因素。另一位特首黑馬郭榮鏗,中小學都係讀名校喇沙,但十幾年來從冇做過班長、行長、領袖生,形容自己只係平平無奇嘅一嚿泥。

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載