蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年05月03日

推銷政改被指「呃細路」
高永文突情緒失控

【本報訊】特區政府過去一周動員司局長落區推銷政改方案,食物及衞生局局長高永文、發展局局長陳茂波昨日分別到牛頭角及秀茂坪派發宣傳單張。有市民遇到高永文時大罵「呃細路」推假普選,高不滿有人「嗌完就走咗去」即上前截停對方,雙方在街頭激辯,高其後拋下一句「講完!」就轉身離開;陳茂波則遇到市民叫他「收皮」,陳回應說:「我哋會繼續努力。」事後高永文承認自己一時無法控制情緒,希望市民諒解。

記者:呂浩然

相關新聞:專家:應該係高永文真性情

特區政府自上周啓動政改宣傳,為免泛民激進人士追擊,一概不公佈特首、官員落區時間和地點。高永文昨早到牛頭角上邨派發政改單張時,先向小童入手,即使對方說對政改「判斷唔到」,高仍然耐心解釋,指政改問題事關重大,希望他們了解和支持。
這時在場一名相信是反政改方案男子,似對高向小童宣傳政改不滿,在旁大叫高「呃細路」,上前批評高落區「嘥氣」,說罷準備離開,高見狀即叫住該名市民與他理論:「呢位先生,唔好講完嘢走咗去」,又稱:「我就唔鍾意啲人一嗌完就走咗去,有嘢就講。」

自認忍唔住 望公眾諒解

該名市民隨即與高理論,反覆質問高:「乜嘢叫千二人(提名委員會)?千二人可以代表全香港呀?」該市民又指由提委會篩選的候選人,「一個白髮魔女、一個豬膶腸、一個……三個人畀你選,咁你選邊個?」
高永文未有正面回應質問,不滿該市民言論帶侮辱成份,「首先我已經唔贊成你用一啲咁嘅形容詞,好似有少少侮辱一啲人」,又稱「做人嘅嘢,有理想冇問題,不過唔應該用自己嘅理想去加諸全香港咁多人身上」。該名市民也開始動氣,再罵高「呃細路仔」,又不斷追問提委會組成問題。
其間高多次插口不果,結果激動地叫該市民「聽我講埋」,接着指「我同每個細路仔,我都講有人贊成、有人反對,我係問啲細路仔,點樣自己去分析,點樣贊成抑或反對,係用自己嘅獨立思考。講完!」隨即拂袖而去,該男子只能向高的背影說:「你不如去精神病院講喇!」
事後高永文承認自己也是普通人,「唔可能喺任何時間都能夠控制自己嘅情緒」,又指該名市民無給他解釋的機會,才令他「忍唔住」,希望公眾諒解。

相關新聞:蘇錦樑派單張 長者嘔吐

阿婆:局長都好慘

至於另一名落區局長陳茂波在秀茂坪派單張時,有長者向他投訴特首梁振英,「應該炒魷魚啦呢個梁振英」,陳試圖向老伯解釋「佢(梁振英)好努力呀」,又有年輕人拒接陳派的單張,更邊行邊說「收皮喇」,陳只能望着青年背影,握拳為自己打氣:「我哋會繼續努力嘅。」對於市民負面反應,陳茂波覺得社會有不同意見屬十分正常,香港作為開放的公民社會,有言論自由,這亦是本港的優勢和好處。
公民黨陳家洛和工聯會黃國健皆不認同高永文的做法。陳認為事件顯示出高的心理質素欠佳,「我諗佢真係覺得自己民望好高,於是佢接受唔到大家對政府嘅批評」。黃國健也指出,高永文身為公眾人物,無論是否有理,在鏡頭前動氣都「梗蝕底」。不過黃認為高永文也「會攰、會有情緒」,況且事後高已承認不足,故予以諒解。
牛頭角邨街坊對高永文表現毀譽參半。康先生認為高作為高官「好失禮香港政府」,批評高「講完就冇嘢講,你咩態度啫?」梁婆婆則替高永文不值,覺得「局長都好慘,條氣都好唔順」,又指與高爭論的男士應該「慢慢講」。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載