蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年04月29日

政壹花生友:
何俊仁或再披甲戰區選
- 花生友

之前透露有意退任嘅何俊仁,傳聞會再次出戰區選。資料圖片

區議會今年11月就會舉行,各大政黨、政團已經部署得七七八八。外界一直盛傳,律師會前會長何君堯有意挑戰民主黨何俊仁所屬嘅屯門樂翠選區,花生友聽聞,泛民預視今屆區議會選舉形勢險峻,希望保得一席得一席,所以之前透露有意退任嘅何俊仁,相信會再次出戰。
何君堯4年前成功令新界王劉皇發讓路,做到屯門鄉委會主席,順理成章做埋屯門區議會當然議員。4年後,發叔成功「光復」屯門鄉委會,最近獲任為新主席,令何君堯突然變三失,冇咗鄉委會主席、鄉委會執委同區議員身份。如果要喺區議會留守,就一定要經直選洗禮。
與此同時,何俊仁早前放風話有意退下來,好大可能唔參選今屆區議會選舉,盛傳搵來乳鴿溫朗鈞接棒。但係花生友最近聽聞,由於何君堯來勢洶洶,令民主黨都嚴陣以待,經評估後,覺得何俊仁所屬嘅屯門樂翠區有被攻陷嘅危機,所以游說何俊仁爭取冧莊,而溫朗鈞就會轉去開拓另一區。
但係何俊仁若然要再參選,都要面對兩大考量,首先當然會被批評唔嫁又嫁,阻住黨內第二、三梯隊上位啦;其次係選舉風險,因為仁哥上屆面對人民力量陳偉業狙擊,最終兩個泛民相爭下,只係以不足400票贏獨立候選人沈錦添,所以仁哥今次都未必穩操勝券。有區內人士分析,鄉議局主席劉皇發撐唔撐何君堯,會成今次選舉贏輸關鍵。
花生友

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載