› 選擇地區
三藩市
紐約
洛杉磯
其他美國地區
香港 台灣 北美
 
2015年04月28日

政壹花生友:
狙擊落區 正中政府下懷? - 花生友

上周六高官「離地」落區。資料圖片

高官落區遇狙擊?對唔少政界中人嚟講,預咗啦,有乜咁出奇?但成班高官卻選擇離地,又確係幾離奇。花生友聽過一位官員私下講笑話,其實越多人狙擊、越亂嘅話,對政府嚟講未必冇着數。點解?咪就係大條道理話畀外界聽,「好多人搗亂,宣傳唔到,下次落區唔可以公佈嘞」,從此佢哋唔使公開落區宣傳行程,外界吹得佢脹咩?
花生友聽聞,就連建制派都對呢啲大龍鳳落區活動未必好like,好似上星期政務司司長林鄭月娥去見十八區區議會正副主席講政改期間,雖然都有唔少各區頭目拍晒心口,話會喺司長落區時做得好好睇睇,但亦有人「進諫」話類似周三喺深水埗搞嗰場啟動禮嘅大媽舞就可免則免嘞,一嚟冇作用,二嚟俾人笑老土,何必呢?何必呢!
據知政府內部亦唔係個個鍾意咁高調宣傳,覺得有時靜靜地派完嘢,影張相擺上fb宣傳仲好。而屢次嘅狙擊活動,似乎亦令政府更加大條道理匿埋宣傳,有口痕友話:「喂,次次落區被圍有乜謂?我哋都可以話啲示威者阻住其他市民接收資訊,因此唔事先張揚好正常箒!」
花生友以前聽聞過,有啲政府中人評估過,覺得越多呢類示威、越多人同情政府,橫豎唔支持政府嘅,有冇呢類示威都唔會支持;但如果係冇乜立場嘅中間派,可能見到咁都會覺得使唔使咁?或者由憐生愛都未定。
所以話呢,梁振英上周三知道有示威都堅持落區,唔通真係太得閒?睇嚟係計過度過囉。

花生友

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載