› 選擇地區
三藩市
紐約
洛杉磯
其他美國地區
香港 台灣 北美
 
2015年04月28日

隔牆有耳:
解放軍下月殺入中大
與學生打籃球 祖堯BB請食飯 - 李八方

駐港解放軍殺入中大校園!講緊嘅係駐港解放軍下個月8號會去中大聯誼。近日中大研究生會已經開始招募學生參加,講明講得一口流利煲冬瓜嘅同學優先。
八方拎到由中大研究生會發畀會員嘅電郵,話嚟緊會有「100名錚錚鐵骨的軍旅兒郎將與中大學生相處一整天!」成日流流長做乜?除咗參觀校園,賣點之一係同「男神沈萌萌」(即係中大校長祖堯BB)嘅午餐之約。食飽飯後,解放軍仲會同學生切磋下籃球技術㖭,唔知祖堯BB會唔會變身啦啦隊為同學打氣?

學生會長話唔恰當促解釋

查實駐港解放軍以往都去過其他院校,伎倆不外乎搵班年輕官兵同學生一齊上堂同打波,推銷佢地有幾親切和善咁囉。最經典一次,係2009年去城大時,學生會長李安然同解放軍副政委曾慶年握手後突然擁抱對方,連曾少將都好愕然。
不過去到中大,就未必會遇到熱情招待喇。中大學生會會長王澄烽同八方講,以現時政治形勢,解放軍入校園活動好惹人遐想,並唔恰當,質疑校方係咪主動安排,亦唔明解放軍嚟聯誼為咗乜。而活動更由祖堯BB親自接待同共晉午膳,顯示校方隆重其事,希望校方盡快解釋。佢又話校方冇叫過學生會幫手招募學生,亦都冇本科生收到由校方發出嘅招募通知,質疑活動嘅性質同埋對象。
八方問過中大同駐港解放軍,呢壇活動到底係乜?解放軍截稿前未回覆,中大就話解放軍過去都有互訪聯誼,請學生參觀軍營同到訪校園,中大仲同解放軍協商緊訪問,細節落實就會由學生事務處邀請所有同學報名。至於點解中大研究生會率先出電郵,佢話個會係幫手做初步工作喎。

李八方

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載