› 選擇地區
三藩市
紐約
洛杉磯
其他美國地區
香港 台灣 北美
 
2015年04月10日

隔牆有耳:fb愛情「謝絕」大戰
黃絲女晒胸 藍絲仔騷肌 - 李八方

警民關係因為一場雨傘運動而撕裂,但都唔使敵視到港女謝絕黑警、港男唔要熱狗女啩?有黃絲港女日前喺facebook發起「港女謝絕黑警男友」嘅自拍行動,唔少港女上載露乳溝、晒長腿等性感照,話唔同「黑警」做情侶,結果惹起撐警嘅藍絲港男不滿,設立「港男謝絕熱狗女」群組反擊,話拒絕同黃絲熱狗女拍拖囉。
港女晒身材、港男又有乜嘢好騷?除咗靚車同名錶,唔好忘記男士都有人魚線,同女性嘅事業線不相伯仲,有港男則大晒腹肌兼露底,擺出最強形體抗衡,點知有眼利網民發現相中人着嘅係A貨Calvin Klein底褲,質疑佢國產貨扮港男,有人留言話「識著(着)一定著(着)Cailan Kalai」喎。

周庭:性格重要過靚仔

身兼正義聯盟召集人嘅李偲嫣一度喺fb上載手持「撐警」字句嘅女子相片,點知被網民踢爆女事主原圖係寫上「謝絕黑警」,俾網民話佢中伏誤傳改圖。原來偲嫣BB係無辜㗎,有網民其後喺正義聯盟專頁承認改圖並致歉。

查實拍拖啫,使唔使咁有針對性呢呢?八方問過人稱藍絲「收工男」、保衞香港運動發起人傅振中,佢覺得呢啲互相杯葛好無聊,話反佔領運動成功咗,社會應該和諧啲,唔好咁對立。佢話就算政治立場唔同,如果互相尊重同欣賞對方,都可以走埋一齊,「男女朋友最緊要講愛,愛就有包容,亦都係凌駕政治立場,做到咪最好囉」。八方見到有網民話,唔會畀個女嫁畀警察,順道問傅振中,如果第時佢個仔娶咗個黃絲老婆,呢位深藍老爺又點睇?佢笑笑口話黃絲都有唔同程度,揀個好媳婦都有好多唔同因素,「唔可以單憑佢一條藍絲定黃絲就判定佢係(咪)好人」。

黃絲女、學民成員周庭就覺得唔需要特登開個網上群組去謝絕乜乜男女朋友,因為擇偶條件大家都心中有數,但佢覺得擇偶要考慮政治立場係無可避免;至今單身嘅佢話揀男友都會睇政治立場,「起碼要有偈傾,投票唔會投建制派」,最好興趣相近,「例如鍾意動漫啦,哈哈哈,講吓啫」,「我覺得最緊要係性格啱more than靚唔靚仔囉」。

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載