蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年04月09日

政壹花生友:
錢志健或山頂披甲撼自由黨 - 花生友

佔中十死士之一錢志健。 資料圖片

特首梁振英「非梁粉即敵人」的好鬥施政作風,雖然成功令白鴿黨同自由黨越走越近,自由黨更喺民主黨黨慶豪捐幾十萬,但一講到選舉,民主派同建制派始終冇偈傾。最近花生友聽聞,有泛民中人有意喺山頂選區上陣,挑戰自由黨當區現任議員陳浩濂,唔想畀建制派自動當選;而呢位仁兄就係佔中十死士之一嘅錢志健。

減白鴿黨所受衝擊

花生友聽聞,喺佔領行動期間,成功團結唔少金融界中人合力爭普選的對沖基金經理錢志健,早前曾經同民主黨中人傾過區選嘅問題,席間就有人就建議,錢志健不妨諗諗參選山頂選區吖,更加表明錢志健若然肯參選,相信白鴿黨同唔少泛民中人都會力撐,與此同時,錢志健亦可以透過區選平台,宣揚金融人爭取真普選嘅理念。
據聞連陳浩濂嘅身邊人都覺得,錢志健若然有機會同陳喺公開論壇「對決」,論口才未必輸。
有泛民中人話喎,自由黨已經部署派人,力搶白鴿黨資深中西區區議員鄭麗琼嘅議席,若然錢志健肯為泛民出戰,相信可以間接減少白鴿黨受到嘅衝擊。
錢志健接受花生友查詢時就話,至今未決定係咪參選,現時一切只屬考慮階段,佢話目前最重要係爭取太太以及前當區議員陳淑莊嘅支持。
雖則未定意向,但錢志健都理解,要爭奪山頂選區議席絕不容易,但佢又話喎,一旦參選,定必全力去做,相信最快呢個星期有最終決定。

花生友

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載