› 選擇地區
三藩市
紐約
洛杉磯
其他美國地區
香港 台灣 北美
 
2015年03月31日

政壹花生友:
梁粉怪論 CY點都會連任? - 花生友

梁振英

雖然早前有建制派權威消息人士分析,泛民一旦否決政改方案,特首梁振英極可能連任,反之梁振英喺普選下,定遭選民唾棄難再連任,但有屬忠實梁粉的建制派人士,近日就提出相信會嚇怕唔少香港人的怪論,反駁上述理論。
到底有乜嘢咁嚇人?呢位梁粉話喎,一旦通過政改,梁振英明顯已完成阿爺「硬任務」,阿爺必想呢位稱職夥計繼續留任,屆時建制派有意爭奪特首人士,定必因唔想得罪阿爺而縮沙、唔報名參選,「阿爺想梁振英繼續做,有邊個建制派夠膽出嚟同佢爭?」
原來喺梁粉心目中,只要梁振英任內落實一人一票普選,加上之前「和平解決」佔領行動,即使民望再低,阿爺肯定無唔畀佢連任嘅空間,「就算唔係直接、都會間接幫佢,肯定會說服啲有影響力嘅政團支持佢連任」,再加上梁振英現時在位,政治資源上有一定優勢,梁粉認定一人一票,梁振英唔係一定輸。
吖,咁政改原地踏步,689係咪一定連任呢?梁粉陣營同權威人士意見相近,話梁連任「機會更高」,因為屆時只維持千二人提委會,「689分分鐘變896」,相信屆時嘅選委一定睇住阿爺嘅欽點令「自動識得諗」,然後佢講咗樣令花生友聽完戚戚然嘅分析:「有人話唔想梁振英連任就要通過方案,係有少少道理;但其實通唔通過,佢連任機會都好高。」

花生友

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載