› 選擇地區
三藩市
紐約
洛杉磯
其他美國地區
香港 台灣 北美
 
2015年03月31日

隔牆有耳:暗指嘉儀BB嘲剋死老爺
小珍怒火新聞線 - 李八方

早排TVB新聞小花周嘉儀離職,唔少宅男喊咁口,八方真係估唔到,喺嘉儀BB離開TVB後,竟然仲有是非纏身,疑似被另一個TVB主播小花林小珍爆大鑊,不點名怒插對方話佢剋死老爺。
話說嘉儀BB正式告別TVB當日,以前同佢合作過《香港早晨》節目嘅林小珍,已經喺facebook貼咗段耐人尋味留言:「今日,四方八面的朋友、家人、同事都前來恭喜我。我,都要恭喜大家。」當時大家都唔知小珍想講乜,直至噚日似乎真相大白。

佩服吳若希保護家人

小珍噚日喺fb留言,話睇完吳若希反擊網民搞佢因為單車意外受傷嘅媽媽時,令佢諗起年初時老爺彌留期間,自己經常進出醫院,有時臨時請假探病,一名剛離職嘅「周姓女同事」好關心佢喎,成日四圍打探佢嘅行蹤,「得知我家中有事,猜測『我丈夫出去偷食』,後來得悉我老爺身體問題,就說成是『我一入門,就剋死老爺』,咒老人家『死快點』。」
小珍話最後佢老爺過身,因為搞白事忍咗呢口氣,「沒有找她晦氣,亦沒有要她道歉」,直至睇咗吳若希嘅言論,好佩服佢好勇敢,後悔當日點解冇開聲,好好保護佢家人咁話喎!「周姓女同事」係邊個?怕且唔使八方畫出腸嘞啩!據聞兩位小花曾經感情要好,唔知因乜事鬧翻,喺公司見面都面左左,估唔到會爆大鑊。嘉儀bb回覆八方查詢時話,現時只會將精神專注喺新工作同學業上,無意義嘅事情唔會理會,多謝大家關心。

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載