› 選擇地區
三藩市
紐約
洛杉磯
其他美國地區
香港 台灣 北美
 
2015年03月20日

隔牆有耳:連環懶幽默
鬍鬚曾變爛Gag品客 - 李八方

財政司長曾俊華今年大玩親民形象,先開facebook、之後同成班記者以神棍玩selfie、近排更接受電視台訪問講自己有幾似Pringles薯片嘅「品客叔叔」,到最近仲一不做,二不休,索性做埋爛Gag王,繼前日送陳茂波一個「big one與碧雲」爛Gag後,噚日佢喺商界午餐會又搞爛Gag,仲即場吟番首詩,懶幽默提醒班商界,今年暴風雨或較去年更多,似乎有乜暗示,不過有人話似乎同李力持啲《真係笑話》一樣,唔多好笑囉。

午餐會突然吟詩

話說鬍鬚曾噚日去午餐會,商界梗以為佢硬銷預算案,所以台下商界人士好識做,問佢可以點擴闊稅基,點知鬍鬚曾唔直接答佢,改用爛Gag答佢,話稅呢家嘢永遠係敏感事,永遠冇一個啱嘅時候討論,之後就話可以開徵嘅稅,其實只有兩種,「一種是帶來痛苦的稅,另一種是帶來更多痛苦的稅」。就係咁,一個爛Gag搞到台下捧腹大笑,大家笑完以為佢答咗,其實乜都冇答過。
品客又做埋天氣先生,話香港近排已變得又暖又濕又大霧,話如此春天氣息令佢諗起英國詩人Tennyson嘅名句:「In the Spring a young man's fancy lightly turns to thoughts of love」(在春天,年輕人的遐想總是轉到愛情上),話港人每天匆匆忙忙,唔夠浪漫聞下路上花朵香氣。唔怪得鬍鬚曾嘅中產定義係飲咖啡同埋睇法國電影啦,佢真係夠晒離地。
鬍鬚曾之後講到近日港元轉強,又搞爛Gag話不無好處,好似港人可去日本「濕平」、去法國買葡萄園,又話要等下次聯儲局開會先至知道美國係咪加息,其實鬍鬚曾乜都冇講過,只可以話夠幽默,笑吓好過俾人教訓囉。

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載