› 選擇地區
三藩市
紐約
洛杉磯
其他美國地區
香港 台灣 北美
 
2015年03月19日

隔牆有耳:
Invader港作品被清 林嘉欣感可惜 - 李八方

嘉欣BB出席「法國五月」記者會,引述Invader話全球得香港移除佢嘅作品(右圖)。 馮就康攝

舊年法國街頭藝術家Invader喺香港做咗唔少作品,但好快被路政署拆走。噚日「法國五月」宣佈五月一至十七日喺PMQ有Invader "WIPE OUT" 殲滅展覽,個介紹好抵死,話香港係好特別嘅地方,清潔工好快咁清走近九成作品,於是為呢個咁奇怪嘅措施命名WIPE OUT,重現所有在港作品。

作品五月重現

法國駐港總領事館負責文化項目嘅蔡穎話,呢個展係Invader首個亞洲展,有約五十件作品,Invader會用港式藥房霓虹燈、李小龍功夫為題創作。
佢啲作品全部都一式兩份,一份貼喺街、一份攞去賣,今次五月展出攞去賣嘅版本,所以早前被政府拆走嘅作品,又有得再睇。
幫「法國五月」宣傳嘅林嘉欣上個月跟住Invader遊巴黎,了解佢嘅創作,引述Invader話全球只有香港移除佢嘅作品,嘉欣BB對此感到可惜。民政事務局副局長許曉暉噚日出席記者會時,被問到政府應否保留Invader作品時只稱:「到時會去PMQ欣賞展覽,希望圓滿成功。」

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載