› 選擇地區
三藩市
紐約
洛杉磯
其他美國地區
香港 台灣 北美
 
2015年03月19日

隔牆有耳:
湯狀缺席黨慶 惹反面疑雲 - 李八方

公民黨今年九周年黨慶,卻只低調慶祝,日前喺炮台山嘅黨總部切蛋糕就算,參加嘅都係核心黨員,約有五十人。但從大合照可見,政改立場同該黨唔多啱key嘅創黨成員湯家驊Ronny竟然冇到,何解黨慶咁大件事都唔畀面,莫非湯狀同個黨已經反咗面?Ronny噚日同八方講,佢真係唔記得黨慶喎,加上自己已經唔係執委、又冇人提佢,直至噚日喺facebook見到黨慶大合照,先驚覺錯過黨嘅生日會。

稱結婚周年亦要人提

原來當日黨慶除咗切咗個蛋糕、食咗兩隻燒豬,仲有成打代表年初二有人跌低嘅麒麟啤。主席余若薇、黨魁梁家傑等巨頭都有出席;立法會議員陳家洛就一早話明要睇阿囡喺學校表演,預先請假,議員中獨欠湯家驊,連Ronny嘅過氣「入室弟子」曾國豐同新界東未來接班人楊岳橋都有出現,Ronny喺敏感時候冇亮相難免惹猜疑。
湯狀強調自己第一次唔記得黨慶,話連結婚周年紀念都要秘書提。會唔會為此向黨員say sorry?Ronny話:「Love is never having to say sorry(愛就是永遠不必說對不起)」,前提係湯狀對個黨仲有冇愛先?

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載