› 選擇地區
三藩市
紐約
洛杉磯
其他美國地區
香港 台灣 北美
 
2015年03月18日

政壹花生友:
齊昕令梁粉心如鹿撞 - 花生友

特首梁振英次女梁齊昕昨日在facebook的帖文內容令人十分擔心。 資料圖片

花生友噚日一朝早起身開WhatsApp,即刻收N咁多個訊息,幾乎全部內容都係關於齊昕,事關佢嘅facebook留言引起唔少人恐慌,唔少人都問花生友:到底佢係咪真係俾阿媽打?精神狀況好似好唔妥噃。清官難審家庭事,花生友又點知道呢個香港第一家庭,到底出現咗乜嘢問題吖,但若然齊昕繼續玩轉全港,有啲梁粉都未必再撐梁振英選特首喎。

計時炸彈礙連任

修身齊家治國平天下,其實早喺齊昕舊年主動踢爆被老竇阿媽擺佈、喺海德公園影咗張扮溫馨家庭相,繼而仲接受傳媒訪問數落阿媽後,有挺梁中人都話,齊昕似乎係梁振英嘅「計時炸彈」,如果唔好好處理一下,相信殺傷力勁過鬧梁振英施政差。
有好事之徒話呀,據講CY都知大鑊,事發後都同齊昕傾過,而齊昕向來都同老竇關係比較好,因此沉寂過一排,君不見一家三口仲去摩天輪前食雪糕。
但一如CY所講,據知齊昕情緒唔係太穩定,而佢呢排頻頻見報、尤其喺ball場娛樂版,或惹雙親微言,唔排除因而被辣㷫。
本來一個廿幾歲女做啲乜嘢,唔太關公眾事,但「特首個女」呢四粒字卻令佢一舉一動都係焦點。噚日仲發展至疑似家暴事件、又叫白車又報警,唔多唔少影響CY形象,所以有政界中人話喎,CY晏晝特登出嚟見記者,講明齊昕有情緒起伏、要接受治療,某程度都止到少少血,「唔好畀件事繼續發酵,相信有啲市民都同情老竇阿媽嘅」。
有梁粉早前同花生友講過,梁振英若然要爭連任,齊昕可能係佢最大阻礙。唔知齊昕呢次玩鋪勁,梁粉會唔會心如鹿撞不知點算好?

花生友

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載