› 選擇地區
三藩市
紐約
洛杉磯
其他美國地區
香港 台灣 北美
 
2015年03月18日

隔牆有耳:鄉議局倡搞保衞隊
決戰反水貨 - 李八方

近月反水貨客嘅示威活動話要「光復」新界各區,但呢啲新界領地都由鄉議局一班大佬睇場,難怪搞到新界鄉頭咁鬼㷫,噚日有人提議組織「鄉郊保衞隊」,獲唔少人Like,有人仲建議警方開「開綠燈」畀佢哋決戰。
鄉議局噚日開執委會,啱啱喺星期六喺屯門過境巴士派傳單,反對反水貨人士使用暴力嘅屯門鄉委會主席何君堯,提出強烈譴責反水貨客人士違法行為嘅臨時動議,最後一致通過登報譴責。

盼警方開綠燈

其中鄉議局增選執委梁海明認為應該組織「鄉郊保衞隊」應戰,批評反水貨客人士如紅衞兵,差過黑社會。如果真係有保衞隊,元朗屏山鄉委會主席曾樹和肯肯定係成員,佢噚日激動話,如果下次有人踩入元朗反水貨客,希望警方「開綠燈」,畀十五分鐘時間佢哋打場大仗:「我預咗唔撈呢個位,係面子問題!」佢話不忿對方有意挑釁,爆粗指:「你克制到,我切咗條X佢」。
喺「光復」上水活動期間高調出巡嘅上水鄉委會主席侯志強,自然佔一席位,啱啱成功連任主席嘅佢話,幾星期前已聯絡商戶、居民代表、地區人士同租戶等,討論組織維持地區秩序,例如貨物要放好唔阻街,然後當然係譴責反水貨活動形同搗亂。
身為主席嘅劉皇發又點可以唔發聲?佢發言時批評反水貨客欺凌婦孺老弱行為令人髮指,話明唔會袖手旁觀,強烈支持警方依法打擊有關行為。以發叔咁德高望重,大概可以做保衞隊總指揮。連同早前坐鎮鄉公所應對反水貨示威嘅十八鄉鄉委會主席梁福元,呢隊保衞隊「勢」力逼人。

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載