› 選擇地區
三藩市
紐約
洛杉磯
其他美國地區
香港 台灣 北美
 
2015年03月17日

隔牆有耳:劉迺強旗下組織新搞作
「吃史」網 播「史片」 - 李八方

「吃史」網當中嘅短片欄目,更加叫做「史片」㖭。

有人叫你食屎,諗都唔使諗就兜掃把「烹」佢走啦,但係一個中史資源網站開宗名義叫「吃史」(eat story),不單止唔趕客,反而因為「食字」引起唔少迴響,成功吸睛。當中嘅短片欄目更名為「史片」,怕且中史學生呢鋪想唔認讀「屎片」都唔得。
呢個「吃史」項目由基本法委員會委員劉迺強任召集人嘅「大中華青年在線」推出,以漫畫、圖片同短片等形式介紹中國歷史。
八方發現網站內嘅動畫欄目轉載多條由央視高級編輯陳曉卿執導嘅紀錄片《百年中國》,配以粵語旁白同繁體字幕;而一堆「史片」中,則有多條由北京「國家開放大學」製作、介紹中國文化嘅短片。

「驚做咗出嚟冇人睇」

本身係香島中學教師嘅項目副召集人王翠蘭,噚日接受電台訪問時話「(名稱)唔係特登」,只是開發小組比較多年輕人,「佢哋好驚做咗個網站出嚟冇人睇,或者冇人覺得得意有趣」。佢前日接受報章訪問時就話「吃史」係取材自「民以食為天」嘅概念,寓意歷史和食物一樣,都係咁重要。
原來開發團隊去年四月開始籌備,成員都係義務參與,冇任何政治背景,內容由團隊自行決定,劉迺強同機構都冇過問或審查內容。
王翠蘭希望網站作為資訊平台,可兼容各家各派歷史論述,唔會迴避任何歷史事件。加入六四事件怕唔怕畀內地封殺?佢話仍然鑽研呢個問題。

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載