› 選擇地區
三藩市
紐約
洛杉磯
其他美國地區
香港 台灣 北美
 
2015年03月16日

創業青年:做老闆為hea超錯

【本報訊】為了解決青年向上流問題,政府大打創業牌,設立配對基金助年輕人創業,就連馬雲也豪捐十億元設青年創業基金,但不等於青年做老闆從此很容易。
成立四年多、至今有逾四千成員、涉三千幾間公司的「青年創業軍」,去年隨機訪問一百間公司,發現創業兩年後仍可維持經營的僅12%至13%,提醒擁有創業夢的年輕人,勿為求hea住做老細,低估創業難處。
「嗰時俾傳媒呃咗,吓吓話八十後創業,幾個月就可以賺幾多百萬……」青年創業軍創辦人之一的溫學文,與拍檔王藝彬是12%成功創業者之一。由畢業後邊打工儲錢、到毅然投身創業開IT公司,首兩個月生意額僅兩萬元左右,到公司今年踏入第四年,每年純利才有七位數字。

首筆資金勿靠家人

他指創業之路越走越孤單,其後靈機一觸成立青年創業軍,打造平台結集有志創業的青年交流,「合縱連橫」創造合作機會,並組隊到各大商會活動偷師兼尋找商機,四千成員也在此平台互吐苦水。
綜合逾90%失敗個案,主要「死因」無非是租金貴推高創業成本、被迫轉戰網上卻欠推廣知識等,王藝彬指青年創業很多時輸給租金,創業經費或僅能負擔兩、三個月租金,一旦營運未如理想,三個月後結業時有所聞。
若不想捱貴租,「大環境逼你走網上創業嘅路,但如果連網站都整唔好、唔識將網站推廣,行落去最後多數會失敗」。
技術問題可以補足,更大問題卻是性格與心態,溫說:「打工時老細叫你做嘢覺得好辛苦,有人因為咁考慮創業,但千祈唔好咁做,因為平時打工,九點至七、八點頂到盡,創業係廿四小時兼禮拜六日都冇得停;如果你覺得做老細好自由、可以hea、輕鬆啲,走創業呢條路係大錯特錯。」
他們亦不太贊同創業首筆資金靠家人,「如果第一下已經依賴身邊嘅朋友同屋企人去借資金,已經好大依賴性,但可以依賴得幾耐?我當佢唔使還都好,如果搞得唔好,要另一筆錢,係咪又問屋企人借?不斷有種依賴性,公司冇可能成長得好」。
■記者陳雪玲

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載