蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年03月16日

隔牆有耳:男神反水客變網上罵戰
高登仔狙擊范國威 - 李八方

網民暱稱「高登男神」嘅新民主同盟范國威(Gary),二○一二年被高登仔力捧下進入立法會,不過近日就因為反水貨客同退聯等議題,惹起高登仔反彈同狙擊,仲有人話要對佢「票債票償」!
究竟為乜搞到咁大件事?原來之前屯門反水貨行動,有部份示威者嚇喊細路同有港人被誤中副車,范國威之後接受訪問時話,如果佢唔採取呢啲擦槍走火、踢人圍罵嘅方法抗爭,「佢(支持者)唔追隨我係完全冇問題」,再加埋近日新民主同盟因中大退聯問題,與已退黨的中大本土學社召集人劉頴匡矛盾全面爆發,而高登入面又有班人撐劉頴匡,結果連「高登男神」都畀高登仔狙擊!

「仲有邊個未俾高登反?」

不過,Gary係高登都有支持者,所以難免會變成高登仔網上罵戰:有人話Gary想扮本土派大佬,呼籲網民下屆唔好投票畀佢;但亦有人反駁:「人地(哋)一直標榜自己溫和本土派喎,冇變過冇呃你喎。」仲有人問:「仲有邊個未俾高登反?」
咁八方就問Gary點睇,佢就好認真咁澄清,自己冇講如果佢唔以踢人、圍罵方式抗議,支持者唔追隨都「冇所謂」,當日係話「冇問題」。即係一簽多行、自由行政策一日未調整,佢都會用唔同途徑爭取、抗爭,搞社會行動、約見官員、政策倡議等等,認為爭取可以各司其職,但如果行動過火位,令爭取的目標模糊化就唔好喎。開講有話,「寧得罪小人,莫得罪高登」,唔知Gary怕唔怕被狙擊?佢一句到尾,總之繼續做好本份啦。

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載