蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年02月13日
馬上成為壹會員

隔牆有耳:I’m just齊昕
CY女K.O.董伯 膺時事金句王 - 李八方

紅透半邊天嘅特首女梁齊昕,唔單止可以擔正做佢夢寐以求嘅電影女主角,最近人氣仲擊敗前特首、全國政協副主席董建華!雅虎香港噚日公佈近四個月以嚟嘅時事金句王排行榜,睇吓網民近期經常搜尋乜嘢人物同埋金句。齊昕接受報章訪問時嘅一句「I'm just齊昕」,不單成為萬能key俾人無限延伸,仲擊敗董伯伯「貴姓呀,陳生?」呢句無敵廢話。年紀輕輕已經擊敗國家級領導人,未來果然真係屬於年輕人嘅。如果齊昕可以喺大銀幕上再次演繹呢句金句,票房一定有保證。
雅虎香港分析去年十一月至今年二月期間嘅網上搜尋金句,相信可以預視一吓今年大家拜年時嘅話題,除咗齊昕同董伯伯問鼎首兩名,第三位係荒謬無極限嘅亞視執行董事葉家寶嗰句「香港人唔可以冇亞視」,真係勁揪過元秋。

「睇住呀」震懾排第四

第四位係喺上海人踩人慘劇後,緊急應變中心安全主任梁國安講解市民救人時應該以震撼性聲音嗌「睇住呀!」以求自保。
而香港首富李嘉誠被問到係咪會收購亞視時,一句「你覺得我好得閒?」嘅無敵回應就問鼎第五位。跟隨其後係民建聯鍾樹根嘅「串流等如下載」,電腦知識令人滴汗。
日圓匯率創新低,近一季市民最常搜尋嘅目的地梗係日本,首三位經常搜尋嘅旅遊熱點依次係大阪、首爾、名古屋,東京第四,曼谷第七,台北第八。去旅遊梗係要搭飛機,港人最常搵嘅航空公司都係廉航,好似香港快運、樂桃、香草,可能係港人對國泰太熟悉,唔使搜尋已經識得打個網址啩。

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載