蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年02月11日
馬上成為壹會員

政壹花生友:
公民黨九歲生日唔大搞 - 花生友

公民黨下個月都九歲生日,但今年未必會搞晚宴。資料圖片

民主黨二十歲生日,黨慶當然要搞得有聲有色,點知遇上特區問責班子,想好似前年自由黨黨慶咁樣玩「集體失蹤」,目前為止,只係得做過該黨副主席嘅運輸及房屋局局長張炳良應承會去。而原來另一泛民政黨公民黨,下個月都九歲生日,唔知係咪見到民主黨被杯葛咁慘,前車可鑑,花生友聽聞公民黨都未必會搞晚宴咯。
有公民黨中人同花生友話喎,個黨考慮到近來工作都非常之辛苦,為咗畀時間大家回一回氣,同埋將啲精力集中放返喺年宵、籌款呢啲工作,所以𠵱家考慮緊今年不如唔搞黨慶,唔知好唔好?
其實以往公民黨都有為黨慶慶祝㗎,除咗晚宴,亦都試過舉辦電影籌款,當時連政務司司長都有出席,不過嗰陣時嘅司長係唐英年囉。時間方面,都係四、五月左右。
花生友覺得今時今日咁嘅氣氛之下,生日都係無謂大搞喇,一來年尾就係區議會換屆選舉,留番啲心機應付選舉好過,再者出年就係十周年生日,不如下年一次過大搞仲好。話時話,如果公民黨搞黨慶,邀唔邀請特區政府班問責官員?
呢個問題都幾頭痕。如果唔邀請就好似擺出一款拒人於千里嘅態度,俾人口實話拒絕溝通,邀請的話,又請唔請梁振英好呢?定係好似民主黨咁唔請,事關對方獲邀後唔肯嚟咪好𤓓?

花生友

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載