› 選擇地區
三藩市
紐約
洛杉磯
其他美國地區
香港 台灣 北美
 
2015年02月04日

隔牆有耳:傳唐營富二代入熱廚房
劉鳴煒答應做「富」局? - 李八方

政府突然調動財委會議程提前審議創新及科技局,反映特首梁振英對創科局過關都好有信心,唔驚同拉布議員玩鋪勁。八方聽聞,CY甚至連局長人選都有埋,但副局長花落誰家,仲未明朗化,但前日CY見到華人置業集團主席劉鳴煒時,竟然笑住話對方「已答應做副局長」。嘩!富二代肯入梁班子熱廚房,係真唔係呀?

啱啱接手打理華置

八方噚日向唔少政府中人打探,統統話冇聽聞曾任唐唐競選辦副秘書長嘅劉鳴煒會入政府,有人話劉鑾雄啱啱先將華置交畀愛子打理,劉鳴煒冇理由突然放棄家族生意唔理啩?而且喺位於灣仔嘅華置做老闆、好過屈就喺金鐘添馬艦政總受氣吖。尤其呢個特首唔係唐唐喎,所以懷疑係咪CY一廂情願?
八方睇過,華置市值有成四百幾億,而做副局長,月薪只係局長薪酬嘅大約七成,即係頂到盡都係廿零萬,如果入咗政府,劉鳴煒名副其實係「富」局長。問題係,政府請唔請得起佢先?
有口痕友話,劉鳴煒幾乎被公認為富二代中較踏實嘅人,獲委任唔少公職,有實戰經驗,CY情傾於佢,未必無因。成為焦點嘅劉鳴煒,噚日晏晝如常出席扶貧委員會會議,被八方野生擒獲追問時,佢對傳聞只係回應「多謝關心」,但都好禮貌咁企定定俾八方影相。商務及經濟發展局局長蘇錦樑就話,冇呢方面嘅資料同消息,不能作回應。八方噚日都有喺一公開場合問CY係咪搵劉鳴煒做副局?但佢冇開腔回應。

李八方

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載