› 選擇地區
三藩市
紐約
洛杉磯
其他美國地區
香港 台灣 北美
 
2015年01月29日

政壹花生友:
港大退聯公投 有戲軌可尋? - 花生友

日前港大學生會就脫離學聯舉行論壇。

雨傘運動中後期,激進行動派成日掛在口中嘅一句係「學聯不代表我」,力倡無大台、無大會,而呢個社運策略分歧,喺雨傘運動結束後仍然延續。一班被指係本土派、行動派嘅港大生,質疑學聯喺佔領期間未及時將行動升級,而且「世襲」大中華價值、意識形態單一等,要求港大學生會退聯,學界議論紛紛。
港大嘅退聯公投下月初就舉行。花生友聽聞,對比二○○六年退聯公投因為法定投票人數不足而失敗,呢次似乎有更多學生關注,相信投票率都夠,至於贊成退聯定係反對嘅較多?暫時冇一面倒形勢,但有學生質疑退聯派嘅理據。
話說退聯派話,港大學生會如果退出學聯,就可以喺學運圈更獨立自主,但有學運中人分析,學聯體制、架構等只係佢哋提出退聯「面個浸」原因,至於實際有乜目的?
呢位學運中人未同花生友明言,但叫支持嘅學生參詳吓民主黨喺二○一一年同二○一二年兩個選舉中被激進民主派狙擊嘅戲軌,或可參透一二。同埋佢話喎,中共一路以嚟開動國家機器想整頓大學學生會,而港大一向係學聯嘅中堅,如果今次退聯成功,學聯號召力大減,以後各有各做,力量分散。
但花生友喺佔領期間都聽到唔少關於學聯嘅批評,包括決策、行政亂,資訊唔夠透明等,退聯派確實係將呢啲流弊作為退聯要求,唔知港大嘅學生又buy唔buy?

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載