› 選擇地區
三藩市
紐約
洛杉磯
其他美國地區
香港 台灣 北美
 
2015年01月29日

隔牆有耳:CY林鄭各自帶隊 
梁班子離奇分兩團北上 - 李八方

梁振英

佔領行動結束,梁班子又開始內交。梁特同政務司司長林鄭月娥,雙雙喺星期五分兩個團,帶埋過半數局長訪問內地,奇就奇在兩個團都係去深圳、兼且都會見深圳市委書記王榮。有政圈中人話奇怪,為乜去深圳都要分道揚鑣出發?而財政司司長曾俊華就要喺嗰日晏晝,留港做半日署理特首!

財爺做半日署理特首

話說林鄭當日朝早仲係署理特首,下午則去深圳同深圳市市長許勤開深港合作會議,仲帶埋運輸及房屋局局長張炳良、民政事務局局長曾德成、食物及衞生局局長高永文、環境局局長黃錦星等。CY則喺同朝早去廣州同深圳,禮節性拜訪廣東省同深圳市主要領導,佢嘅代表團都唔少人,包括政制及內地事務局局長譚志源、教育局局長吳克儉、發展局局長陳茂波等。CY同林鄭離期間,鬍鬚曾下午坐陣做署理特首!
有政圈中人奇怪,為乜林鄭同CY要一齊去深圳、又一齊見深圳市委書記王榮,但要分兩個團?似乎仲搞到隨行局長都唔夠分,好似譚志源跟CY團、林鄭就只好帶政制及內地事務局常任秘書長張琼瑤隨行,估唔到CY連內訪都要同林鄭分得清清楚楚。
有官場中人話林鄭個會一早Plan好,至於CY為乜嘢同日出發,則係特首辦同內地安排!但佢都同意,如果夾好啲時間就好啲,尤其內地官場,幾時拜會點到香港話事?唔知做半日特首嘅鍵盤戰士鬍鬚曾,係咪會趁政府冇乜人時,靜靜哋寫blog以便周日用?

http://www.pf_lee @appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載