蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年01月27日
馬上成為壹會員

政壹花生友:
區選測試田少搣柴效應 - 花生友

田北俊

區議會選舉今年十一月舉行,花生友之前講過,唔少建制派都呻民建聯霸道,揀晒易贏嘅選區後,留返啲豬頭骨畀其他建制政黨。好似自由黨呢個建制「壞孩子」咁吖,阿爺唔會撐得行、自然唔夠民建聯爭,惟有主攻風險較大嘅中高產區博一博,睇吓「田少搣柴」效應可唔可以延續落去,吸到中間派支持。

兩區專攻政治議題

雖則區議會選舉一向主打民生議題、地區事務,不過呢,自由黨卻睇準雨傘運動後民主黨、公民黨等會流失中間溫和派支持,喺擬出選廿個區當中,揀咗兩個區專攻政治議題,希望舉住反佔領、爭普選旗幟搶灘。最受佔領行動影響嘅中西區係目標之一,據知佢哋計劃派出有「八十後短炒王」之稱嘅吳龍飛,硬撼次次都高票當選嘅民主黨老將鄭麗琼;另一個狙擊目標係喺酒會上撐過黃傘撐佔領嘅司馬文,由教育局前政助楊哲安上陣,殺入薄扶林選區。
至於其他選舉,都係主攻民生議題,同時睇吓「田少搣柴」效應,可唔可以幫該黨贏完掌聲、擸埋選票。
花生友聽聞,自由黨早前做過內部民調,發現田少支持度高企,但內部對結果分析審慎,話上屆立法會選舉,民調都話田少有好高支持度,結果出嚟係僅僅夠票當選,所以認為知名度未必能轉化為選票,特別係蛇齋糭餅氾濫嘅區議會選舉,講到底都係靠勤力落區「密密派」,先至得米。

花生友

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載