蘋果日報 | APPLE DAILY
› 選擇地區
三藩市
紐約
洛杉磯
其他美國地區
2015年01月21日

隔牆有耳:記招金句 笑爆全場 
董建華:貴姓呀?陳生 - 李八方

嫌「香港好 國家好 國家好 香港更好」太out?覺得「要離開好易,留低卻需要好大勇氣」用得有啲濫?八方推介前特首董建華最新金句。噚日佢喺記者會上以一句「貴姓呀?陳生。」笑爆全場,到底係搞爛gag、一時講錯抑或就嚟年屆七十八,有啲老懵懂?八方真係唔知,只知董生畀咗好多娛樂大家,仲以一個土豪金眼鏡盒搶晒鏡。

落車健步如飛

查實董生噚日個記者會,一如以往要求傳媒喺發問前介紹番自己係邊間機構以及叫乜名。有位記者發問之初唔記得介紹,被在場公關提點,但當佢講完係《中國日報》陳某某、並繼續提問後,董生聽聽吓突然插嘴:「貴姓呀?陳生。」全場聽到立即爆笑,但董生就似冷面笑匠,當乜事都冇發生過。有口痕友就建議公關大員,下次為現場物件貼上稱號,咁董生一定唔會唔記得啦!
八方有理由懷疑,董生有時真係聽唔到記者姓乜,因為佢都同時問過另外一個已報上名來嘅記者貴姓。咁聽力差咗係咪因為身體唔好?八方又唔覺喎,事關足足一個鐘嘅記者會,董生都企足全場冇腳軟。有記者問佢會唔會腳痛?佢話企得多都會,不過𠵱家做多咗運動會好啲。有記者話留意到佢手震喎,董生反問「唔係話」?話自己仲係ok!
而董生噚日坐車去到位處半山嘅前特首辦公室,落車時都健步如飛。邊行邊同記者say hello嘅佢,手上仲攞住一個「土豪金」物品,繼而將之「袋住先」,放入西裝褸袋。唔少人覺得呢個「土豪金」係手機或者卡片盒,原來統統都唔係,八方問過董生發言人,佢哋話係眼鏡盒至真,董生用咗好耐㗎嘞喎。

李八方

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載