› 選擇地區
三藩市
紐約
洛杉磯
其他美國地區
香港 台灣 北美
 
2015年01月20日

鳩嗚乜乜乜:港女遊台推爛鐵騎

同款本田NT650T電單車。

繼女租霸之後,再有香港女士「揚威」台灣,今次遭殃嘅係一位台男,同埋佢「二奶」──一架新車價要成四十幾萬台幣(約十萬港元)嘅重型電單車。

#地檢署不起訴

台灣桃園地檢署噚日審理一單case,一名去台灣旅遊嘅麥姓香港女子,舊年11月21日下午喺桃園市石門水庫,有水庫唔睇,去停車場睇車,見到一架電單車本田NT650T,覺得好型,竟然當自己係女版劉華,就咁跨過去坐喺人哋架車影相,但懷疑唔不小心推跌架車,結果右側車殼同右照後鏡破損,排氣管變形等。
法院冇提架車幾錢,但據報架車喺台灣新車車價約四十幾萬台幣,就算舊車都要約二十萬台幣(約五萬港元)。周姓車主見到報警,提出毀損起訴。不過,地檢署噚日認為麥女唔係故意,決定唔起訴處分。可憐嘅周男只可循民事向麥女要求賠償。
據了解,麥女52歲,應該之前已經返咗香港。「唔係呀嘛!騎上人哋架車影相都得!?」香港電單車賽車手張煒安認為麥女嘅行為唔要得,唔尊重人哋。
佢話都去過台灣旅行同揸電單車,當地電單車多,會泊滿行人路邊車位,旅客行過手多多隨時推塌成行車,整爛啲車之餘,自己都危險。佢話事件中嘅電單車屬重型車,隨時壓死人,而且跌落地,車身氣喉肯定跌壞,喺香港整都要兩萬幾蚊㗎。
文明旅遊有幾咁重要,香港人應該有切膚之痛。己所不欲,大家出外旅遊,都俾少少規矩吖。

費清  #要生計,也要生活 #毋忘初衷

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載