› 選擇地區
三藩市
紐約
洛杉磯
其他美國地區
香港 台灣 北美
 
2015年01月19日

隔牆有耳:
「白宮發言人」 有個飛人女友 - 李八方

自比「白宮發言人」嘅新聞統籌專員IC馮煒光,終於有拖拍唔再dry爆,難怪噚日以「個人身份」出席港台節目《城市論壇》時春風滿面,甜絲絲向八方透露女友係「飛人」,唔好以為係空姐喎,只係女友鍾意玩滑翔傘箒,噚日亦因為「飛咗」而無法捧場,但馮煒光依舊隔空發放「愛的宣言」。

隔空表白恨娶心

其實去年曾被八方影到單拖去睇戲兼行書局嘅IC,原來喺早前脫離單身行列,有傳媒元旦日見到佢同一名女士十指緊扣睇《歌聲魅影》音樂劇,但當時IC堅稱單身,截至前日先肯同八方報喜話蜜運嘞!
八方噚日喺《城市論壇》問IC,點識到女友?拍咗幾耐拖?係咪元旦手拖手嗰位?佢都怕怕醜支吾以對,淨係透露對方玩滑翔傘,笑言:「我飛上天識……」八方唔知佢係咪用呢種馮氏幽默,冧掂女友,但明顯都有少少恨娶的心。
話說節目期間,《學苑》前副總編輯王俊杰以指腹為婚、盲婚啞嫁形容中港關係,仲打個比喻問IC:「如果要你同(民建聯議員)蔣麗芸結婚,要你義無反顧愛護佢,你肯唔肯?」IC當然冇正面回應,但被人問多兩問突然趁機表心迹:「我同任何人結婚都會好忠誠。」啱啱自爆有拖拍,咁快就諗結婚?唔知佢嘅「飛人」女友,受唔受𠱁呢?

李八方

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載