› 選擇地區
三藩市
紐約
洛杉磯
其他美國地區
香港 台灣 北美
 
2015年01月16日

政壹花生友:
新加坡官員唱衰香港 - 花生友

有傳新加坡官員向外國人唱衰香港。資料圖片

好多政商界以至政府中人,開口埋口都新加坡同上海都係香港嘅競爭對手,如果香港仲唔發憤圖強,就被搶走國際金融中心地位,云云。到底香港係咪真係咁不濟?花生友唔係專家,無能力將三地各項經濟數據逐一計,但卻有一樣嘢想同大家分享,就係新加坡佬官員好鬼緊張佢哋個地位,據聞仲會喺國際間,唱衰香港喎。
話晒花生友都喺官場都有唔少朋友,最近不約而同聽聞佢哋話喎,新加坡好緊張同香港嘅比併,仲會出口術抬高自己㗎。此話何解?原來有官員話呀,有啲friend底嘅外國官員朋友同佢哋私下「爆料」,話新加坡嘅官員,不時喺佢哋面前講香港壞話。
到底香港有乜壞話好畀人講?據佢所知,千篇一律針對香港係由中國共產黨統治㗎,質疑喺咁嘅極權國家控制下,投資環境同發展前景會好咩?查實唔少外國人都矇查查,點會知香港回歸後實行嘅一國兩制到底係乜東東?好容易就盡信新加坡官員嘅片面之言,對香港前景都逐漸覺得堪虞。
有官員話呀,好在佢哋有外國官場朋友通風報訊,先知道香港被新加坡佬「唱衰」,而面對呢個「唱衰」攻勢,佢哋都冇乜好做到,最多花多啲口水解釋。當然啦,如果特區唔會不時爆出染紅新聞、而政府又冇唔會被指聽晒中共說話,相信新加坡「唱衰」香港嘅話柄,就會少啲囉!

花生友

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載