› 選擇地區
三藩市
紐約
洛杉磯
其他美國地區
香港 台灣 北美
 
2015年01月12日

隔牆有耳:處男撈魚 唔識用陰力
民望高做唔成金魚佬 - 李八方

民望高撈金魚唔識用陰力,一撈就穿咗個窿。

如果有朝一日食物及衞生局局長高永文要退休,似乎佢都只可以重操故業做番醫生,唔可以做「金魚佬」咯!嗱,八方口中嘅「金魚佬」係正當人家,即係擺檔畀小朋友撈金魚嗰啲叔叔。點解人稱民望高嘅高永文,冇呢個發展潛力?無非都係因為佢,唔識用陰力囉,撈魚唔成得個「窿」!
民望高噚日真係由朝到晚忙到無時停。佢先喺凌晨5點幾凍冰冰撲入打鼓嶺,視察本地活雞檢查站嘅臨時運作情況。據聞在場人士見到局長現身都好意外,估唔到佢咁上心。之後佢就轉去東涌主持「昂步棧道2015」籌款活動開幕,繼而由新界西去番新界東,去到大埔出席冬日慈善行活動時,仲試玩撈金魚㖭呀。

獲市民贈魚笑咪咪

據同為冬日慈善行活動主禮嘉賓嘅立法會漁農界代表何俊賢話,當民望高喺大埔水陸墟現身時,有啲小朋友叫局長玩撈金魚,局長雖然話自己未撈過,都順應民意處男下海。原來佢唔知個網係紙,唔係真嘅魚網,結果唔識用陰力,一撈就穿咗個窿,乜都撈唔到,相反何俊賢就一撈千金。
零魚穫當然令民望高好尷尬,但有民意支持,果然零舍不同。有市民見局長咁可憐,即場將自己嘅魚穫轉贈,等佢一嚐金魚佬滋味。見到局長之笑咪咪,就知條金魚令佢幾咁happy。民望高嘅政助話,局長撈魚後仲轉戰港島出席兩個活動,一日到黑無時停。

李八方

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載