首先要同大埔嘉道理農場一帶嘅居民耍個冧！皆因費清要話畀大家知，今年「香港花見」搶先嚟咗，嘉道理農場櫻花早開咗成十日，已經開緊花喇（圖）！同時，即係果區好快又會大塞車喇！
過去兩三年，每逢1月底，台日韓櫻花都未開花，嘉道理農場上山區胡挺生先生紀念亭，幾十棵鐘花櫻桃（即台灣山櫻花），會開滿紅色小花。
港大校長府第都有
春暖花開，好友前兩日去嘉道理遊玩，自然狂影一番。（利申：費清都係龍友）佢WhatsApp咗啲相過嚟，嘩，原來鐘花櫻桃已經開緊花，未開嘅則含苞待放大有爆發之勢。觀乎，過埋呢兩日比較寒冷嘅日子後，氣溫會明顯回升至20℃左右，有利開花，推算本周末前後將會爆紅，比以前早成十日，要賞花就唔好錯過。
賞花最好揀平日去，較容易坐到農場嘅穿梭巴士上山，周六日及假期人多未必坐到。不過，行上山都唔錯，沿途多處都種咗好多梅花。想追貼開花期，可以like嘉道理農場facebook專頁。
影櫻花最好用長鏡，因為開花時會吸引相思雀飛嚟吸食花蜜，冇支長鏡影唔到。其實市區都有個地方有鐘花櫻桃睇，就係港大校長府第，入面種咗三棵，舊年開得好紅，唔知馬斐森校長可否搞個賞花開放日呢？另外，長洲關公亭都有鐘花櫻桃盛開。
中大知行樓都種咗20棵河津櫻，大帽山扶輪公園櫻花園裏面就有40棵寒緋櫻，但都要2月初先開花。
費清 ＃要生計，也要生活 ＃毋忘初衷
