› 選擇地區
三藩市
紐約
洛杉磯
其他美國地區
香港 台灣 北美
 
2014年12月23日

隔牆有耳:
狼英抽習總水呃like - 李八方

俗語都有話啦,執輸行頭慘過敗家;假若執到好嘢仲唔急急抽水自用,更加對自己唔住啦。喺呢方面,八方相信狼英好有「心得」,事關呢頭國家主席習近平見完佢,大讚公務員喺佔領期間緊守崗位後,狼英同日已向公務員發署名信,話要轉達中央嘅讚許之餘,同時加多幾錢肉緊讚公務員盡忠職守,擺明借習總把口呃like啫!
事緣習總上周五、即係19號去到澳門後,曾經閉門接見過狼英,事後官媒報道,習總當場讚揚狼英、特區政府同警隊「恪盡職守、勇於擔當」。八方聽聞,查實讚狼班子嘅時候,習總都有提過公務員喺佔領期間緊守崗位,值得表揚。

急發信「轉」讚公務員

嘩,有習總開腔力撐自己嘅管治團隊,狼英似乎自覺執到寶咁款,事關身在澳門嘅佢,同日已經急急向公務員發放有自己署名嘅信「報喜」,執習總口水尾,讚佔領運動持續兩個幾月,公務員堅守崗位,盡心竭力執行職務,所以特別致函say thank you,仲話公務員團隊係香港重要嘅一員,亦係特區重要夥伴,係安定繁榮關鍵嚟㗎,特別申明「謹此轉達中央對各位的讚許」。
有公務員講笑話,獲習總讚賞當然士氣振奮,但狼英使唔使抽水抽得咁急?寸爆話如果唔係狼英處理失當,佢哋都未必要捱咁多日佔領嘅苦日子!

李八方

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載