› 選擇地區
三藩市
紐約
洛杉磯
其他美國地區
香港 台灣 北美
 
2014年12月13日

隔牆有耳:泛民被扣警署 待遇有別
葵涌食芽菜 屯門嘆雞粥 - 李八方

泛民議員噚日為真普選公民抗命被捕後,即被警方送往屯門、葵涌同埋觀塘警署拘留和落口供,被拘禁的泛民議員噚日分享各自「享受」嘅待遇,先發現原來差好遠,有人冇啖好食、有人可以好似《無間道》入面曾志偉咁,可以叫乜嘢食都得、仲好好招呼!

張超雄有最好「服務」

八方收集議員嘅意見,發覺觀塘警署「服務」最好,但立法會議員中,只有工黨張超雄一人被送到該署。據講服務好在室內拘留問話,唔使留喺警署停車場長期「食風」,飯餸亦有最多款式,有魚和茄子、粟米斑塊等飯盒,隔幾個鐘又有餅乾食,朝早更有麥記做早餐,令送去葵涌警署嘅黨友何 E E大嗌羨慕。
點解何 E E要羨慕呢?因為葵涌警署真係冇啖好食!喺葵涌警署嘅單仲偕同八方呻,佢話伙食認真麻麻,佢自己係太平紳士,早已見識過唔同監倉嘅「皇家飯」,但佢話警署提供嘅「芽菜火腿絲飯盒」,真係仲難食過監倉飯,結果單雞要做「花生友」,食黨友帶來嘅花生頂肚。而同樣困喺葵涌警署嘅肥佬黎,就索性叫屋企人送盒私房炒麵,同好友馬丁、余若薇同埋梁家傑分享。
不過最好伙食嘅警署,要數拘留周永康、李卓人、陳家洛嘅屯門警署,佢哋話有點心燒賣、雞粥食,後來義務律師團又送咗十幾個飯盒,多到食唔晒要由「住客」打包攞走。

李八方

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載