› 選擇地區
三藩市
紐約
洛杉磯
其他美國地區
香港 台灣 北美
 
2014年12月10日

隔牆有耳:你當我是龍蝦吧~
狼太得到注意呀! - 李八方

諗到聖誕節去ball,着咩衫搶鏡未呢?咪話八方唔賣大包益街坊,一套人形龍蝦裝,肯定激發大家齊齊為你唱支song,「你當我是龍蝦吧,誇張只因我很怕,似葉劉,似月娥的話,得到注意嗎?」嘩!係咪聽出耳油,「妖娘」三日呢?真係多得狼太大膽創新嘅衣着配搭,令大家喺呢段苦日子笑瞇瞇。
有人問我,我就會講,自從狼太上周六以一襲大紅套裝、配以一個紮馬霸氣動作登場,令大家領略到衣着品味嘅最高境界之後,「人形龍蝦」隨即喺各界四處遊走,「人潮內越文靜越變得不受理睬,自己要搞出意外」,相信連狼太本人,都估唔到搞出咁大意外。

配搭伊麵 網民like爆

龍蝦配伊麵底,是常識吧!無論係墊底抑或伴碟,都係最佳配搭令人好開胃,難怪當蝦look狼太獲伊健襯托,唔少網民都話好like;之不過,呢種到底係「胃口」抑或「畏口」呢?睇嚟八方無謂去深究,我涼薄到無奈,都無理由呼籲,有人來噴奶要記住帶袋啩?
若然講到無奈,唔知狼英見到夫人咁嘅打扮,着最閃的衫,做特首棵菜,會唔會都同網民有同樣嘅質疑:係咪「熟」過頭呢?當反佔中團體都大大聲聲話呀:是可忍、「熟」不可忍,面對狼太「熟」女如此,狼英唔知仲係咪可以,大快朵頤?
查實呀,狼太願意喺政改困局下扮隻蝦,落鑊豪大家,都算幾有心吖,至少令大家笑到wakaka。又或者佢明知自己喺政圈只係臨記一名,所以至放大來演吧,但很不安,怎去優雅?有此蝦look夫人,世上還讚頌梁特嗎?八方都唔知呀,只知道噚日人人哼住「你當我是龍蝦吧~」,多得梁柏堅將《浮誇》改詞做《龍蝦》。

【龍 蝦 (改編自《浮誇》)】

有人問我 我就會講 
但是無人來
我涼薄 到無奈 
有話要講 得不到轉載
我的底褲猶像樽蓋 
等被揭開
衰佬卻像瞓棺材
人潮內 越文靜 
越變得 不受理睬
自己要搞出意外

像大紅日急call
任何地方也像想拆大台
着最閃的衫 做特首棵菜
有人來噴奶要記住帶袋

你當我是龍蝦吧 
誇張只因我很怕
似葉劉 似月娥的話 
得到注意嗎
其實我係臨記 
至放大來演吧
很不安 怎去優雅
世上還讚頌梁特嗎?
識佢臭化 怎麼有話題
扮隻蝦 落鑊豪大家

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載