› 選擇地區
三藩市
紐約
洛杉磯
其他美國地區
香港 台灣 北美
 
2014年12月01日

隔牆有耳:搶屯門區議會席位
何仙姑後人vs鐵頭仁 - 李八方

未來三年都係特區選舉年,先有明年底嘅區議會選舉、再有2016年嘅立法會改選,2017年則有特首選舉重頭戲上演,如果要喺政圈分一杯羹,各路人馬係時候要備戰。而倒數約一年嘅區議會選舉,想入場嘅人已經磨拳擦掌,政圈盛傳前律師會會長何君堯會上陣,硬撼現為屯門區議員嘅民主黨何俊仁。

冧莊鄉事會主席無望

其實何君堯要轉戰直選,源於鄉事會明年初改選。現為屯門鄉事會主席嘅何君堯,若然要續以當然議員身份晉身屯門區議會,必須保住鄉事會主席,但據知佢上屆揮低劉皇發做主席後,未獲鄉事會歡心,相反發叔卻翻盤在即。既然連任主席無望,係時候搵位落腳,以民選議員身份留喺屯門區議會。
有傳佢吼實何俊仁屯門區樂翠選區出征。何君堯曾經喺08年自爆睇過族譜,成千年前有位曾祖姑姐,就係八仙之一嘅何仙姑,所以一場何仙姑後人大戰鐵頭仁好戲,即將上演。點解要揀鐵頭仁嚟撼?唔通貪佢個頭夠硬?八方聽聞,何君堯或睇準鐵頭仁同佢一樣係律師,而鐵頭仁喺建制派猛批違法嘅佔領運動走在最前線,甚至被網民砌佢違反律師守則,相反何君堯就搞咗檔「保護中環」反佔中,若然以藍絲帶形象打法治牌,未必唔可以搶到鐵頭仁嘅選票。
而樂翠選區範圍呢,原來包括埋發叔鎮地龍鼓灘喎;唔知雙何硬仗若上演,發叔會幫邊一邊?

李八方

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載