› 選擇地區
三藩市
紐約
洛杉磯
其他美國地區
香港 台灣 北美
 
2014年11月26日

隔牆有耳:狼英、林鄭齊出埠 
清場 財爺孭鑊 - 李八方

噚日特區政府「配合」禁制令,開始喺旺角清場,不過喺呢個咁重要嘅時間,狼英同林鄭齊齊公務出埠,留低財爺鬍鬚曾做署理特首睇場。有政界中人同八方講,佔領行動爆發咁耐,已不斷有梁粉篤鬍鬚曾背脊,話佢冇緊跟狼英路線,同班後生仔開火,今次都唔知係咪狼英夾埋林鄭,「明益」鬍鬚曾睇清場,等有乜冬瓜豆腐由佢孭。

遭藍絲梁粉篤背脊

該政界中人同八方講,狼英由頭到尾都主張強硬對付佔領年輕人,而西環嘅小明、主理香港事務嘅人大委員長張德江亦主張打,只係打嚟打去打唔散,所以先出禁制令呢招,用法治做擋箭牌,包裝強硬清場,只要睇噚晚差人行動,開路之後仲追住班示威者,就知開路只係掛個名,拉人清場先係主菜。
不過好衰唔衰,狼英強硬立場似乎梁粉、藍絲帶之外,真係冇乜知音,據該政界中人聽聞,唔少梁粉好不滿鬍鬚曾只係反佔中,但就冇公開撐狼英強硬立場,據聞仲有藍絲梁粉走去篤鬍鬚曾背脊,但正如一啲仲有少少清醒嘅建制中人話齋,強硬清到場又點?同成個年輕一代為敵,以後點管治落去?所以佢哋唔少人私下唔認同狼英,反而認同鬍鬚曾懷柔手段,只係個個見到田少「下場」,免得過唔惹禍上身。
今次清場開始,狼英就將個場交畀鬍鬚曾睇,難免有好事之徒猜測,狼英係咪等萬一清場有乜冬瓜豆腐,要鬍鬚曾冇得置身事外?鬍鬚曾噚晚出席活動後,主動向記者表示,呼籲示威者保持克制、理性,並與警方合作,盡快離開現場,市民唔好去旺角,又話警方係按現場情況執行任務,強調警方係按禁制令執行,亦一定要執行。

李八方

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載