蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年11月21日

前隊員:糾察阻人前進須解散

曾是糾察的「吾港德」不滿金鐘大台「一言堂」。

【本報訊】「旺角分開幾個大組,各自討論再夾埋傾,咁樣幾好;金鐘(大台)好似個帝國,好反感。」每日黃昏,總有一位青年人守在佔旺鐵馬陣最前線,即使「挑機」減少,他仍是腰掛頭盔、腳綁護甲,全時戒備。他雖對立會被爆玻璃有保留,但也不滿糾察隊阻人前進,一概扼殺抗爭升級機會。

「大台淨係畀掌聲自己」

化名「吾港德」的19歲「Band仔」,早年因反對活化工廈趕絕band房開始走上街頭。9月25日起到金鐘守護學生,隨後到過各佔領區,最終落腳旺角,一守便個多月,「旺角啲人好堅,警察清完又再返嚟」。 立會爆玻璃當日,他沒隨隊到金鐘,而是留在旺角引開警力,遙距支援。事件引起溫和派不滿,甚至劃清界線,他事後雖對行動組織者生疑,但也對溫和留守者的反應略感失望,更明言即使金鐘大台不拆,他曾加入的金鐘糾察隊也必須解散,「各人有各自抗爭模式,你唔支持咪唔好去囉,點解要組人鏈阻住、又開咪鬧想衝嘅人?大台點解唔係用嚟通報抗爭現場消息為先,淨係用嚟唱歌畀掌聲自己?」
堅守逾月,阿德為長期抗命而失去正職,聲音也變得沙啞,兩三天才回家洗澡一次,「個人都污糟咗」。對於有市民要求撤離讓路,他說佔領不是為了做「甘地」,「我係要真普選,唔係要市民支持。如果最後爭取到,你𠵱家當我係魔鬼都唔緊要(行動有否底線?) 唔傷害到他人身體。」被指佔領者破壞法治,他怒斥「50年不變係你(政府)定嘅,𠵱家你帶頭破壞法治,有乜嘢資格話我?」
面臨清場,他明言不會強阻執達主任清除路障,但支持變陣轉場留守,不達真普選目的誓不罷休,表明為普選,最大犧牲是受傷、坐監,「出得嚟就唔會諗住冇後果」,但一定會「留住條命,咁先有得爭取」。他又說,必須達致真普選和廢除功能組別才願離開,「淨係CY落台,我都會繼續留守。冇真普選,邊個上、邊個落,有乜嘢分別?」

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載