› 選擇地區
三藩市
紐約
洛杉磯
其他美國地區
香港 台灣 北美
 
2014年11月21日

隔牆有耳:《選戰》主角被指影射主席
曾鈺成:智叔咁靚仔 - 李八方

選舉有幾黑暗同陰毒?大家喺2012年特首豬狼戰都大開眼界。港視睇準港人鍾意睇選舉黑幕嘅心態,以廖啟智同李心潔孭飛嘅《選戰》做開台劇,首集緊湊嘅劇情睇到唔少人好入神,而飾演立法會兼振民黨主席宋漫山嘅廖啟智,小動靜兼且想選特首嘅野心,更加好有曾鈺成嘅身影;但曾鈺成噚日卻笑笑口自嘲,「廖啟智咁靚仔,點樣可以影射到我呢?」唔通佢以為套戲叫《選帥》?

葉劉話好想睇

政界噚日熱論《選戰》,好多人話廖啟智影射曾鈺成,尤其喺黨總部開會嗰一幕,啲小動作同表情抄到足,當然好想選特首嘅壯志,都同曾主席2012年欲替補唐唐入閘好鬼相似。原來呢位「宋主席」,曾經獲「王主任」承諾,若然乖乖地,一定入到禮賓府,點知多年嚟保駕護航,只係幫人抬轎做一哥,自己嘅酬勞只係貴價茶葉囉。相信睇到呢一度,唔止曾鈺成要再搬出金句「有辱無榮」,現實中成屋茶葉嘅建制派,可能都感同身受到眼淚漣漣。
至於參選特首嘅葉晴、即係李心潔,唔覺有乜女政界身影,可能因為政圈冇乜女將似佢咁省鏡。但若然話想做特區首位女特首,葉劉淑儀野心肯定排榜首。葉劉噚日話未睇《選戰》但係好想睇,覺得電視劇影射吓人無妨。咁想唔想做戲中嘅李心潔?葉劉話唔會對號入座喎。
雖則《選戰》劇情同現實政圈好多相似地方,但都有唔少穿崩位。例如特首參選人幾乎全天候被跟蹤兼起底、點會有個秘密班底匿喺工廈冇被發現?撇開行政署冇政治助理呢個職位,按理呢個小角色,都唔會隨便攞到份死因報告啩?而喺解釋醜聞記者會上,就算話明唔答提問,記者肯定都會插嘴搶問,點會似劇中靜局似鵪鶉?仲有呀,做咗特首候選人,就會有G4保護,又點會好似劇中人咁,孤伶伶揸車?但撇開呢啲小瑕疵,相信《選戰》都令唔少政界有所反思。

李八方

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2020 AD Internet Limited. All rights reserved. 版權所有 不得轉載