蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年11月18日
馬上成為壹會員

隔牆有耳:德駐港總領事常去佔區
外國勢力「佔領」立會 - 李八方

立法會「勾結」外國勢力鐵證如山,外交部幾時出稿嚴正譴責? 楊柏賢攝

中央話不容香港受「外部勢力」干預,偏偏立法會就公然「勾結」外國勢力,噚日邀請咗廿幾個美、德、日同芬蘭等國駐港領事「佔領」立法會,仲喺宴會廳開餐吹水,差啲傾到唔肯「退場」。八方聽聞,大家飯桌上除咗風花雪月之餘,話題離唔開佔領行動點收科,而曾經話港人應以香港年輕人為傲嘅德國駐港總領事蘭布斯多夫,原來係佔領區「常客」。

千福BB同琼子密密斟

呢次定期嘅領事飯局有成廿幾個外國駐港總領事出席,最受關注嘅美國駐港總領事夏千福有早冇遲,但拒回應記者提問,仲喺公關大員護航下急急腳離場。而佢離開前,卻同民建聯主席譚耀宗、副主席李慧琼密密斟,譚耀宗話同千福BB講咗,似乎啲記者好想採訪佢喎。
千福BB同李慧琼握手時,琼子狀甚驚訝兼難為情,唔知係咪擔心阿爺話佢「通番賣國」?反而葛珮帆見到千福BB卻好冧,政治不正確,因住阿爺唔高興呀!
德國駐港總領事蘭布斯多夫(Nikolaus Graf Lambsdorff)噚日亦有份佔領立法會。對於上月喺德國統一紀念日酒會上,公開指港人應以香港年輕一代為榮,佢噚日解釋,當日嘅發言係以德文向嚟自德國嘅嘉賓讀出,唔係特登講畀主禮嘉賓林鄭月娥聽,但最後卻被人錯誤引述,澄清並冇講過支持佔領者,反問身為一個外國來港工作嘅公務員,點可能支持犯法嘅市民?

雖然冇話撐佔領學生,但蘭布斯多夫透露,由於領事館座落金鐘,辦公室喺附近,所以都去金鐘佔領區好多次,港版連儂牆都有到過,對喺市區搭建帳幕好意外。佢重申對包括參與佔領嘅香港年輕人印象深刻,相信喺香港做生意嘅德國人冇受佔領影響,力撐香港仍具競爭力,管治良好兼宜居。

李八方
mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載