› 選擇地區
三藩市
紐約
洛杉磯
其他美國地區
香港 台灣 北美
 
2014年11月11日

隔牆有耳:
汪阿姐挺松 唔Like狼英 - 李八方

由老董搞嘅「團結香港基金」智庫噚日舉行成立典禮,十足十係佢「新歡」梁錦松準備參選特首嘅造勢大會,唔知阿董嘅「舊愛」狼振英有何感受?政治就係咁殘酷,搞唔掂嘅就要行開,連阿姐汪明荃噚日都猛讚阿松,唔挺隻狼。有Liza姐力撐,2017年特首選舉,阿松又多個粉絲!
噚日有出席撐場嘅汪阿姐,噚日離場時被問到阿松嘅狀態係咪大勇?阿姐即時大讚阿松:「其實今日聽咗五位講者講嘢,我較深印象係阿松哥,張信剛都講得好好。」連阿姐都尊稱阿松係松哥,又對佢留下深刻印象,果然畀足面。

彈現屆不重視年輕人

咁係咪支持佢參選下屆特首?汪阿姐就話呢個係太遠嘅事,自己都係啱啱加入呢個智庫,會都未開過,總之特首人選,必須能者居之啦。咦咦咦,董生明明話呢個智庫係搞政策研究、唔係搞邊個做特首㗎,唔通阿姐說漏了嘴?
咁狼振英有冇能力呢?阿姐只係話:「我唔知喎,但係佢𠵱家在位,梗係要盡能力做事啦。」半句讚美都唔畀,係咪孤寒咗啲呀?唔驚狼英小器嬲嬲豬咩?阿姐繼而仲大嘆,呢屆政府喺年輕人工作方面,真係做得唔夠㗎,而今次嘅佔領運動,年輕人表達咗強烈嘅訴求,佢作為長輩,都認為特區政府真係要重視、多聽年輕一代嘅意見,擺明都係彈現屆狼班子唔掂啦!
學習總話齋,疾風知勁草;到底狼英同阿松,邊個先真正「信靠得住」?至於邊個係阿姐心中嘅熱咖啡,令佢聲更嗲?畫畫畫出腸,使唔使呀?

李八方

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載