蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年11月09日

敢言校長 反教局「整治」通識科

中學生及大學生是雨傘運動的主力,不少留守學生會於金鐘自修室溫習,晚上更是使用自修室的高峯期。張志華攝

【雨傘革命 第43天】
【本報訊】近年最敢言校長李雪英,昨再以中學校長會主席身份挺身捍衞被建制派「圍剿」的通識教育科,她指出若因佔領運動而要整治該科,是扭曲教育及極危險事件,勸諫教育局勿在此時進行整治,否則只會掀起另一場反國民教育風波。她認為通識科內容和考核模式是否有問題,需要全盤檢視,但不應因一場街頭運動而抽走部份內容,反問「係咪有人做咗原子彈,我哋就抽咗化學科出嚟?」
記者:倪清江 彭美芳 呂浩然

相關新聞:留守者深受鼓舞

「反佔中大聯盟」9月設立舉報佔中學生的熱線後,李雪英校長即痛斥大聯盟製造白色恐怖,喚醒教育界和家長要保護學生。她昨在商台節目《政經星期六》,一口氣於三分半鐘內,接連否定學生參與街頭運動與中史非必修科有關、反對刪減通識科和斥責教育局只懂叫學生不要上街。
建制派認定學生不愛國,是沒將中史列為必修科。讀歷史出身的李雪英斬釘截鐵說:「我唔覺得今次大規模街頭運動,係同學生冇讀中史有關係。五四運動開端都係學生運動,我甚至乎唔相信(學民思潮召集人)黃之鋒呢批同學對中史冇認識。」

「有人做原子彈就抽化學科?」

李指學生對中國感情不夠深厚,與是否讀中史科並不是等號,「所以推動中史教育,係咪等如推動學生愛國,我覺得唔係一個等號……我估好多讀過中史嘅人都喺街頭(參加佔領運動)!」即使中史改為必修,未必可扭轉有關局面,「除非我哋嗰套教育係有特定目的,而唔係一個讓學生思考嘅教育」。
建制派議員葉劉淑儀和梁美芬,以至當年力撐設立通識科的前教育統籌局常秘羅范椒芬,均指摘通識科是促使學生上街元凶,有傳政府極高層已指令教育局「整治」該科政治內容。
李校長豪不客氣反問:「係咪有人做咗原子彈,我哋就抽咗化學科出嚟?」她認為通識科內容和考核模式是否有問題,需要全盤檢視,但不應因一場街頭運動而抽走部份內容,「我諗呢個係完全扭曲咗教育,係好危險嘅事。如果呢個時候去處理通識科,引起會係第二場類似國教科風波!」

相關新聞:警動植物公園佈防市民帶遮即被查

津中議會指勿干預教育專業

中學生和大學生都是今次佔領運動的主力,學生與學生間撕裂,學生與家長間現分歧,中學校長會將於月底展開「身心靈重建計劃」,帶領學生「走出陰霾」。李雪英認為教育局責無旁貸,「教育局除咗提學校唔好帶佢哋出去示威遊行、呢啲活動係非法嘅之外,會唔會佢哋會有多啲支援投放,或者佢哋教育心理學家會去學校睇吓,而唔係我哋民間組織去推動呢?」
津中議會主席林日豐也指出,外界不應干預教育專業,「如果由某啲組織去指導教學,係好危險」。他指全部中學初中均設中史科或整合入初中通識科。

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2018 AD Internet Limited. All rights reserved. 版權所有 不得轉載