蘋果日報 | APPLE DAILY
› 選擇地區
三藩市
紐約
洛杉磯
其他美國地區
2014年10月30日
馬上成為壹會員

隔牆有耳:「外國勢力」非比尋常 
央視美洲台照播和平佔中 - 李八方

大陸官媒幾乎日日批鬥佔中,《環球時報》噚日指戴耀廷同周永康係小丑同歷史罪人,《人民日報》海外版形容佔中係失控高速列車,呢啲評論,相信好多人已經睇到不以為然,但噚日中央台報道佔中嘅消息,卻令人刮目相看,「外國勢力」果然好強。

佔領者彈結他 創作藝術

中央台美洲分台播出一段以「佔中無阻外籍人士移居香港」為題嘅新聞,片段訪問一對移民香港冇耐嘅比利時夫婦,更加罕有播出金鐘佔領區畫面。喺報道之中,央視記者訪問比利時夫婦,佢哋話有留意佔中對香港嘅影響,不過對香港前景樂觀,呢種講法,同中央主旋律顯然唔同。
記者仲訪問移民顧問Steve Lewis,引述佢話唔少移民人士查詢佔領情況,但呢位老外認為,佔領情況唔會持續好耐,認為香港仍係理想做生意地方,央視記者最後指,家陣佔領區部份道路已經通車,話香港正逐漸回復正常,配合金鐘佔領區情況,播出嘅片段見到佔領者圍坐彈結他,同埋有好多帳篷、藝術創作雨傘巨人等,表現好和平,同其他官媒報道抹黑佔中好唔同,而呢啲畫面縱然好正常,由央視播出卻係非比尋常,怪唔得話「外國勢力」不可忽視。同樣屬「外國勢力」嘅Kenny G,睇完轉軚後再轉軚都未遲!

李八方

mailto:pf_lee@appledaily.com

蘋果日報fb,每日分享精選新聞及網絡新鮮事。
返回最頂
壹傳媒: 香港 台灣 | 私隱聲明 服務條款 刊登廣告 聯絡我們 招聘
© 2019 AD Internet Limited. All rights reserved. 版權所有 不得轉載